Akarere ka Nyagatare gafite gahunda yo guhinga ubwatsi bw’amatungo kuri hegitari 5,729 mu gihembwe cy’ihinga cya A 2027, mu rwego rwo guhangana n’ikibazo cy’ibura ry’ubwatsi cyane cyane mu gihe cy’izuba no gufasha aborozi kongera no kubungabunga umusaruro w’amata.
Ubuhinzi bw’ubwatsi bwashyizwe mu bikorwa by’ingenzi biteganyijwe muri iki gihembwe cy’ihinga kiri gutegurwa, kuko ubuyobozi bw’Akarere buvuga ko kubona ubwatsi buhagije no kubuhunika ari ingenzi mu gufasha aborozi kubona ibyo bagaburira amatungo mu bihe byose by’umwaka.
Mu bwatsi buteganyijwe guhingwa harimo Kororisi gayana kuri hegitari 2,500, Urubingo ingeri 200,000, ibitsinsi bya Burakariya 25,000, Kanikumu ibitsinsi 25,000 ndetse n’ibiro 60 bya Mukuna.
Ubuyobozi bw’Akarere buvuga ko ubu bwatsi nibuhingwa kandi bukabungwabungwa neza, buzafasha kugabanya ikibazo cy’ibura ry’ibiryo by’amatungo mu gihe cy’impeshyi, bityo umusaruro w’amata ukomeze kuboneka.
Umuyobozi w’Akarere w’agateganyo, Kakooza Henry, avuga ko aborozi bakwiye guhuza ubworozi bwo mu biraro no guhinga ubwatsi, kuko ari uburyo bufasha umworozi kubona ibyo agaburira amatungo kandi akabasha kubuhunika.
Yagize ati: “Duhora twibutsa aborozi kororera mu biraro hanyuma bagahinga ubwatsi ndetse no kubuhunika kugira ngo twirinde ingaruka z’izuba ndetse n’umukamo twatangaga ntugabanyuke. Muri iki gihembwe cy’ihinga tugiyemo dufite gahunda yo guhinga ubwatsi kugira ngo turebe ko twahangana n’ikibazo dukunda guhura na cyo mu gihe cy’impeshyi cy’igabanuka ry’umusaruro w’amata.”
Iyi gahunda kandi ije mu gihe Akarere ka Nyagatare kagifite icyuho cy’ingano y’amata adahagije akenerwa n’Uruganda rw’Inyange rutunganya amata y’ifu rukeneye litiro 650,000 ku munsi, mu gihe amata aboneka ari litiro 142,655 gusa.
Bamwe mu borozi baganiriye na MUHAZIYACU bavuga ko uretse kuba wahinga ubwatsi ukabasha kugaburira inka zawe, ushobora no kubuhinga ukajya ubugurisha abandi borozi bityo bikagufasha kwiteza imbere.
Rwamugema Henry, umworozi wo mu Murenge wa Karama, avuga ko aborozi bakwiye kwitabira gahunda yo guhinga no guhunika ubwatsi.
Yagize ati: “Dukwiye kujya twumva inama duhabwa n’abayobozi. Guhinga ubwatsi bidufitiye akamaro kanini cyane kuko bukoreshwa bugaburirwa amatungo cyangwa ukabugurisha. Ni byiza kandi ko tugira umuco wo guhunika ubwatsi kugira ngo dusigasire umusaruro wacu w’amata.”
Bingo Marie Engesitoni, umworozi akaba n’umufashamyumvire mu bworozi bw’inka zitanga umukamo ndetse akanatubura imbuto z’ubwatsi mu Murenge wa Karangazi, na we avuga ko ubwatsi ari kimwe mu by’ibanze ku mworozi ushaka gukora ubworozi bwa kinyamwuga.
Yagize ati: “Guhinga ubwatsi ni igikorwa cy’ibanze ku mworozi wabigize umwuga kuko bimworohereza kubona ibyo agaburira amatungo ye ndetse akaba yanabukoramo ishoramari. Ni ngombwa ko aborozi bahugukira guhinga ubwatsi bw’inka ndetse bororera no mu biraro kuko ari byo bitanga umusaruro ufatika.”
Mu Karere ka Nyagatare habarurwa abatubuzi b’imbuto z’ubwatsi bw’amatungo 37, ariko hari gahunda yo kubongera kugira ngo imbuto z’ubwatsi ziboneke ku bwinshi kandi hafi y’aborozi.
Uretse guhinga ubwatsi, muri iki gihembwe cy’ihinga hateganyijwe kandi amahugurwa azahabwa aborozi barenga 2,500 bafite inka nke kandi bororera mu biraro. Muri buri Mudugudu hazatoranywa aborozi batanu bazahabwa amahugurwa agamije kubongerera ubumenyi mu bworozi no kubafasha kuzamura umukamo.
Hazahugurwa kandi aborozi bakorera mu mafamu bagera kuri 250, mu rwego rwo gukomeza kunoza ubworozi bw’inka zitanga umukamo.
Izo gahunda zose ziteganyijwe mu gihembwe cy’ihinga cya A 2027, aho ubuyobozi bw’Akarere ka Nyagatare bwizeye ko kongera ubuso buhingwaho ubwatsi, kubuhunika no kongera ubumenyi bw’aborozi bizafasha guhangana n’igabanuka ry’umukamo mu gihe cy’izuba; bityo umusaruro w’amata ukomeze kwiyongera.
