Ubuyobozi bw’Akarere ka Nyagatare bufatanije na Ibuka, bwatangiye ibikorwa byo kwimura imibiri y’abazize Jenoside yakorewe Abatutsi mu 1994 yari iruhukiye mu nzibutso eshatu zo muri aka karere igashyingurwa mu cyubahiro mu rwibutso rushya rwubatswe ku buryo bugezweho mu Murenge wa Nyagatare.
Muri uku kwezi kwa Mata 2023 nibwo ku bufatanye bw’ubuyobozi bw’Akarere ka Nyagatare, Umuryango Ibuka n’abafite ababo mu nzibutso za Kiyombe, Gatunda na Rwentanga, hatangijwe ibikorwa byo gukura imibiri muri izo nzibutso igatunganywa neza mu buryo bwo gukorerwa isuku, igashyirwa ahabugenewe heza mu gihe hitegurwa igikorwa nyir’izina cyo kuyishyingura mu cyubahiro mu rwibutso rushya.
Amakuru MUHAZIYACU ifite ni uko biteganyijwe ko igikorwa nyir’izina cyo gushyingura mu cyubahiro iyo mibiri mu rwibutso rushya rwa Nyagatare bizaba tariki ku wa Gatandatu tariki 06 Gicurasi 2023.
Umuyobozi w’Akarere ka Nyagatare Gasana Stephen, avuga ko kubikora ari ugushyira mu bikorwa gahunda yo guhuriza hamwe inzibutso bigafasha kubika amateka neza, no guha agaciro abazize jenoside yakorewe abatutsi mu mwaka 1994 bakaruhukira ahantu heza.
Yagize ati: “Kwimura imibiri y’abazize jenoside yakorewe abatutsi igashyirwa mu rwibutso rushya, ni ukubahiriza gahunda ya Leta yo kugira inzibutso zimeze neza zibitse mateka, hari uguha agaciro abazize jenoside yakorewe abatutsi mu 1994 bakaruhukira ahantu heza no kubika neza amateka ya jenoside yakorewe abatutsi mu Rwanda”.
Bimenyimana Jean de Dieu uhagarariye Umuryango uharanira inyungu z’abarokotse Jenoside-Ibuka mu karere ka Nyagatare avuga ko bishimiye iki gikorwa cyo kwimurira iyi mibiri ahantu heza, ati: “Ni igikorwa cyo kwishimira kuko ubuyobozi budufashije guha agaciro abacu, kubavana hariya hantu hatari heza, bakaba bagiye kuruhukira ahantu heza”.
Bamwe mu barokotse Jenoside yakorewe abatutsi mu Rwanda mu mwaka 1994 bo mu karere ka Nyagatare bagaruka k’uko bakiriye iki gikorwa cyo kwimurira imibiri y’ababo mu rwibutso rushya, rwubatswe ku buryo bujyanye n’igihe;
Muteteri Epiphanie yagize ati:” Byatubabazaga kubona ahantu abacu bari baruhukiye, nk’aha ku rwibutso rwa Rwentanga, imva zuzuragamo amazi, tukababara, ariko kuba bagiye kwimurirwa mu rwibutso rushya ni ikintu cyabubahishije”.
Naho Gasangwa Emmanuel we yagize ati: “Twababaye igihe kinini kubona abacu bari baruhukiye ahantu hatameze neza, twarabyifuje kenshi ko bashyirwa ahantu habaha agaciro, ariko ubu nibura tugiye kwishimira kujya tubasanga ahantu habahesha icyubahiro.”
Mu karere ka Nyagatare hari hasanzwe inzibutso zigera kuri eshatu, zose hamwe zikaba zari ziruhukiyemo imibiri igera kuri 92 y’abazize jenoside yakorewe abatutsi mu mwaka 1994, akaba ari nayo izimurwa ikazanwa mu rwibutso rushya rwuzuye mu murenge wa Nyagatare mu kagari ka Nyagatare.
Inkuru bifitanye isano: Kubaka urwibutso rushya rwa Jenoside yakorewe Abatutsi rwa Nyagatare bigeze kuri 96%
