Umuyobozi w’Akarere ka Bugesera Mutabazi Richard yabwiye Abayisilamu bo muri aka Karere bitabiriye isengesho ryo gusoza igisibo cy’ukwezi gutagatifu kwa Ramadhan ko iyo umuntu abasha kwiyima mu byo afite bishimangira umurage w’Abanyarwanda w’ubudasa, anashimangira ko umwitozo wo kwigomwa mu gihe k’igisibo bifasha umuntu guharanira n’irindi terambere ry’urugo n’iry’Igihugu.
Ibi Meya Mutabazi yabigarutseho kuri uyu wa Gatanu tariki 21 Gicurasi 2023 mu muhango wo kwizihiza umunsi Mukuru wa Eid al-Fitr kuri Sitade y’Akarere ka Bugesera.
Yagize ati: “Iyo umuntu abasha kwiyima mubyo afite, bishimangira wa murage w’Abanyarwanda w’ubudatsimburwa. Kuba ushobora guharanira ikintu ukagitsimbararaho; inzara, inyota, ibibazo ntibigutsimbure kugeza ukibonye; aha rero iyo umuntu abasha kwiyima amafunguro kuva umuseke utambitse kugeza izuba rirenze, akiyima gushimisha umubiri we abyemerewe, ni umwitozo wo gutuma hagira n’ibindi yaharanira by’iterambere ry’urugo rwe n’iry’Igihugu yigomwe.”
Yakomeje asaba abayisilamu gukomeza umuco wo kwigomwa no gukomera mu mahame yabo ngo kuko Igihugu cy’u Rwanda cyemera ubumwe mu budasa.
Ati: “Kwigomwa rero tuba twigiye mu kwezi kwa Ramadhan, tuba dukwiye kugukomeza kukaduherekeza umwaka wose. Mu Gihugu cyacu kandi twemera ubumwe mu budasa; abantu twese ntabwo twaba abakristu cyangwa abayisilamu ngo bikunde, ariko twemera ubumwe mu budasa. Buri wese mu myemerere ye ariko tukagaruka tukaba umwe kuko amahitamo y’abanyarwanda ari ukuba umwe.”
Umuyobozi w’Abayisilamu mu Karere ka Bugesera, Sheikh Nteziryayo Said yakanguriye Abayisilamu gukomeza gukora ibikorwa byiza.
Ati: “Turashishikarizwa gukora ibikorwa byiza by’ubugiraneza; mu kwiyegereza abatishoboye. Ntabwo waba umuyisilamu mwiza; umwemeramana mwiza, wifuza ibyiza kuri wowe gusa abandi utabibifuriza; umwemeramana ni wa wundi wifuza ibyiza, ukifuza umutekano, amahoro, ukifuza ubuzima bwiza ariko na mugenzi wawe ukabimwifuriza.”
Sheikh Nteziryayo akomeza ashimira ubuyobozi bukuru bw’igihugu, by’umwihariko ngo kuko babashije gusenga bahuriye hamwe ndetse bakaba banasoje igisibo neza bari kumwe.
Ati: “Turashimira ubuyobozi bukuru bw’igihugu ndetse n’ubuyobozi bw’inzego z’ibanze; kubera ko ubuyobozi bwacu bwashyizemo imbaraga mu ngamba zo kurwanya iki cyorezo mu banyarwanda n’abayisilamu turimo, tugafatikanya kumva no kumvira amabwiriza yo kugira ngo duhashye iki cyorezo, niyo mpamvu turi gusabana gutya kandi mu myaka ibiri ishize ntabwo byigeze bibaho.”
Ukwezi kwa Ramadhan kwasojwe none, kujyana no kwigomwa kurya no kunywa, kwigomwa gukora imibonano mpuzabitsina kuva mu ruturuturu kugeza izuba rirenze mu gihe cy’iminsi 30.
Kwiyiriza ubusa ku Bayisilamu bituma ababikoze bumva uburemere bwo kwicwa n’inzara ku buryo bishobora kubatoza gufungurira abatishoboye, kandi iki gikorwa cyo kwiyiriza mu idini ya Isilamu gifatwa nk’uburyo bwiza bwo gushimira Imana.
Uko kwigomwa kurya, kunywa no gukora imibonano mpuzabitsina, kandi byanagaragajwe n’intumwa y’Imana Muhammad, nk’ikimenyetso cy’uko umuntu yagira ubushobozi bwo kwigenzura. Uko kwigenzura kumubashisha kudahora akoreshwa n’ibyo umubiri urarikira ahubwo akaba yafata umwanzuro runaka ukwiriye mu buzima busanzwe bwa buri munsi.
Mu Karere ka Bugesera habarurwa Abayisilamu basaga ibihumbi bitatu(3,000).
