Ubuyobozi bw’Akarere ka Nyagatare buratangaza ko kubaka urwibutso rushya rwa Jenoside yakorewe abatutsi mu 1994, ruzimurirwamo imibiri yose ishyinguye mu nzibutso eshatu zo muri aka Karere bigeze kuri 96%.
Ubusanzwe Akarere ka Nyagatare kabarizwagamo inzibutso eshatu zirimo urwa Rwentanga rwo mu Murenge wa Matimba urwa Gatunda rwo mu Murenge wa Gatunda n’urwa Kiyombe rwo mu Murenge wa Kiyombe. Biteganyijwe ko izi nzibutso zose zizasenywa maze imibiri igera kuri 80 yimurirwe muri uru rwibutso rushya rwubatswe mu Mudugudu wa Nyagatare , akagari ka Nyagatare mu Murenge wa Nyagatare.
Ni urwibutso ruzuzura rutwaye miliyoni 900 Frw rukaba rugizwe n’ibice birimo igice kizimurirwamo imibiri ndetse n’ikindi gice kizigishirizwamo amateka yaranze Jenoside yakorewe abatutsi.
Umuyobozi w’Akarere ka Nyagatare wungirije ushinzwe imibereho y’abaturage, Murekatete Julliet, yabwiye MUHAZIYACU ko hasigaye utuntu duke kugira uru rwibutso rwuzure neza.
Yavuze ko mu cyumweru cyo kwibuka abishwe muri Jenoside yakorewe abatutsi mu 1994 ku nshuro ya 29 muri Mata, aribwo uru rwibutso ruzimurirwamo imibiri yose y’abaruhukiye mu nzibutso zitandukanye zo muri aka Karere.
Yagize ati” dusigaje utuntu duke two gukora isuku gusa, no gushyiramo ibikoresho bizakenerwamo, tuzatangira icyumweru cyo kwibuka abishwe muri Jenoside yakorewe abatutsi mu 1994 ku mshuro ya 29 byose byararangiye”
Bamwe mu baturage baganiriye na MUHAZIYACU bavuga ko kuba Akarere ka Nyagatare karubatse urwibutso rwiza rugezweho ari uguha agaciro abishwe muri Jenoside yakorewe abatutsi mu 1994 kuko aho bari bashyinguye hatari heza.
Rugengamanzi Garatien yagize ati” Kuba ubuyobozi bw’Akarere bwaratekereje kubaka urwibutso rwiza bivuze ko ari uguha agaciro abacu bishwe uko baremwe”
Uwimana Domina we yagize ati” Ubundi uru rwibutso bavuga ko ruzimurirwamo abacu bishwe muri Jenoside yakorewe abatutsi mu 1994, ibi biragaragara ko ari ukubaha icyubahiro biraturuhura ku mitima kubona abacu baruhukiye ahantu heza”
Mu Karere ka Nyagatare habarizwaga inzibutso eshatu zirimo urwa Rwentanga ruherereye mu Murenge wa Matimba, urwa Gatunda ndetse n’urwibutso rwa Kiyombe ruruhukiyemo abishwe muri Jenoside bo mu muryango wa Musenyeri Selivilien Nzakamwita.
