Ubuyobozi bw’Akarere ka Nyagatare bwasabye abayobozi mu nzego zitandukanye kwita no kunoza imitangire ya serivisi zihabwa abaturage, aho Perezida w’Inama Njyanama y’aka Karere yakanguriye abayobozi kujya bishyira mu mwanya w’abo bagiye guha serivisi; mu rwego rwo kumva neza no gusobanukirwa uburemere bw’ikibazo cy’umuturage.
Byagarutsweho kuri uyu wa 07 Werurwe, mu mwiherero w’abagize Inama Njyanama y’Akarere wabereye mu Murenge wa Rwimiyaga, aho wari uyobowe na Perezida w’Inama Njyanama y’Akarere Kabagamba Wilson.
Uyu mwiherero wari witabiriwe kandi n’abandi bayobozi harimo Abajyanama mu Nama Njyanama y’Akarere, abo ku rwego rw’Imirenge, Abayobozi b’Amashami ku Karere n’abandi.
Bamwe mu bayobozi baganiriye na MUHAZIYACU bavuze ko ubutumwa bahawe ari ingenzi cyane kuko kwita ku muturage ari byo baba baratorewe, dore ko baba baratowe n’abaturage ubwabo.
Nkurikiyimana Ildephonse, Umukozi w’Akarere ushinzwe amasoko yavuze ko igihe umuturage aje gusaba serivisi aba agomba gufashwa kabone n’ubwo waba atari wowe uyitanga ukwiye kumufasha ukamurangira aho yayikura.
Yakomeje agira ati: “Nkanjye mu mirimo nkora, hari umuturage ushobora kuza ku Karere ashaka serivisi zijyanye n’ubutaka, icyo namufasha ni ukumuyobora aho iyo serivisi itangirwa bakamufasha.”
Karangwa Kageruka akaba ahagarariye Njyanama y’Umurenge wa Rukomo yavuze ko gutanga serivise nziza ari inshingano zabo mu rwego rwo gushyira umuturage ku isonga.
Yagize ati: “Badukanguriye gutanga serivisi nziza mu nzego dukoreramo zigiye zitandukanye gusa iyo utanze serivise nziza uba uri gukurikiza inama za Nyakubahwa Perezida wa Repubulika zo gushyira umuturage ku isonga, niyo mpamvu icyo dusabwa ari ukuzitanga neza umuturage akagenda yishimye.”
Perezida w’inama njyanama y’Akarere ka Nyagatare Kabagamba Wilson yavuze ko uyu mwiherero ukorwa kugira ngo habeho kwisuzuma, asaba abawitabiriye kuba nkore neza bandebereho mu rwego rwo gutanga serivisi nziza no gukora ibishoboka byose kugira ngo umuturage agire uruhare mu bimukorerwa.
Yagize ati: “Uyu mwiherero wacu ni umuco tumaze kumenyera by’umwihariko uw’Inama Njyanama, nta kindi kiba cyaduhuje, ni ukugira ngo twisuzume, by’umwihariko nk’Inama Njyanama tuba twaratowe n’abaturage, natwe tuba tugomba kubashyira ku isonga. Ntitukumve ko abadushyize mu nshingano turimo ari bo bazanatubwira icyo tugomba gukora, oya rwose, icyo twifuza nyuma y’uyu mwiherero wacu ni ugukora uko dushoboye kugira ngo turebe uko abaturage batera imbere.”
Ibyavuye mu bushakashatsi bwakozwe n’Urwego rw’Igihugu rw’Imiyoborere (RGB) mu mwaka wa 2025 hashingiwe uko abaturage bashima imiyoborere n’imitangire ya serivisi; byagaragaje ko Akarere ka Nyagatare kari ku kigero kingana na 74.48%.
