Abatuye mu Kagari ka Nyagashanga, Umurenge wa Karangazi, bavuga ko bishimiye iyubakwa ry’ibiro bishya by’Akagari kabo, aho bizeye ko bizafasha mu kunoza imitangire ya serivisi no kuborohereza kubona ubuyobozi mu buryo buboroheye kandi bubegerejwe.
Ibi biro bigeze ku kigero cya 82% byubakwa, bikaba biteganyijwe kurangira mu gihe cya vuba kugira ngo bitangire gukoreshwa, bigasobanurwa ko bizuzura bitwaye miliyoni 44 z’ amafaranga y’u Rwanda.
Abaturage bavuga ko ari igikorwaremezo kizabafasha kubona serivisi ku gihe no gukemura ibibazo byabo bitabasabye gukora ingendo ndende, nk’uko bamwe mu baganiriye na MUHAZIYACU babigaragaje.
Uwitwa Uwimana Claudine yagize ati: “Nk’abaturage twishimiye cyane ko turi kubakirwa ibiro bishya by’Akagari kacu, twizeye ko uburyo twahabwagamo serivisi bugiye kurushaho kuba bwiza kandi bunoze.”
Sindikubwabo Emmanuel na we yagize ati: “Kuba twubakiwe ibiro bishya by’Akagari bizatuma tubona abayobozi bacu ku gihe, kandi serivisi zizajya zitugeraho vuba bitabaye ngombwa ko tugorwa no kubashaka.”
Ubuyobozi bw’Akarere ka Nyagatare buvuga ko iki gikorwa kiri mu bikorwa by’ingenzi bigamije kunoza imitangire ya serivisi no kuzamura imikorere y’inzego z’ibanze.
Umuyobozi w’Akarere ka Nyagatare wungirije ushinzwe Iterambere ry’Ubukungu, Matsiko Gonzague, yasabye abakurikirana iyubakwa ry’ibi biro kongera imbaraga kugira ngo imirimo isigaye irangire vuba.
Yagize ati: “Turasaba abari gukurikirana iki gikorwa cyo kubaka ibi biro by’Akagari kucyihutisha kugira ngo umwaka w’imihigo uzarangire twarasohoje ibyo twiyemeje. Turakangurira kandi abaturage kuzabungabunga iki gikorwaremezo igihe kizaba cyabashyikirijwe.”
Ubushakashatsi bwakozwe n’ Urwego rw’Igihugu rw’Imiyoborere RGB bw’umwaka wa 2025 ku “Ishusho y’uko abaturage babona imiyoborere n’imitangire ya serivisi mu nzego zibegereye (CRC)” bwagaragaje ko Akarere ka Nyagatare kari ku kigero cya 65.5% ku mwanya wa 16 muri serivisi z’ibikorwaremezo.
Abaturage bizeye ko ibi biro bishya by’Akagari ka Nyagashanga bizafasha gukemura bimwe mu bibazo byajyaga bigaragara mu mitangire ya serivisi, ndetse bikarushaho kwegereza ubuyobozi abaturage.
