Abaturage bo mu Murenge wa Rwimiyaga mu Karere ka Nyagatare bakanguriwe gutera ibiti imbere y’inzu zabo mu rwego rwo kwirinda ibiza biterwa n’imiyaga ituruka mu bihugu by’abaturanyi nka Uganda na Tanzania bihana imbibi n’uyu Murenge bikarangira ibasenyeye.
Uyu Murenge ukunze kwibasirwa cyane n’imiyaga ituruka muri ibi bihugu igasenya inzu z’abaturage, kuri ubu ubuyobozi bukaba bwabasabye gutera ibiti bihagije imbere y’inzu zabo, bakanazirika ibisenge kugira ngo bikumire uwo muyanga rushenyi.
Abaturage b’Umurenge wa Rwimiyanga baganiriye na MUHAZIYACU bavuze ko ingamba bafashe nyuma yo gukangurirwa n’Ubuyobozi bw’Akarere kwirinda ibiza zirimo kuzirika ibisenge no gutera ibiti byinshi.
Twizeyimana Zachée aragaruka ku ngamba bihaye nyuma yo gushishikarizwa kwirinda ibiza. Ati:” Tugiye kugenda tuzirike ibisenge by’inzu kugira ngo imiyaga nijya iza itazajya ibisambura kuko aho ibisenge bitaziritse neza umuyaga ubasha kubisambura, noneho n’inzu zidateye umucanga tuwuzitere “.
Akomeza avuga ko bagiye no gutera ibiti birinda ibiza. Ati:”Tugiye gutera ibiti birinda imiyaga kugira ngo nujya uza ujye uguma muri bya biti utajyeze ku nzu”.
Kamanzi Michel na we avuga ko haricyo avanye muri ubu bukangurambaga. Ati:”Icya mbere ni ukureba ko igisenge kiziritse neza gikomeye, ikindi tugiye gutera ibiti hari n’abandi badufasha kubitera leta yashyizeho rero tugiye kongera ingano y’ibiti turwanya isuri kugira ngo twirinde uwo muyaga”.
Gato Emeritha avuga ko n’abagore nabo badakwiye gusigara mu rugamba rwo kwirinda ibiza. Ati:”Nyuma yo gukangurirwa kwirinda ibiza n’Ubuyobozi bw’Akarere nanjye ngiye gutera ibiti mu rugo kuko ibiti ni byiza bizaturida umuyaga wajyaga ukunda kudusenyera natwe rero nk’abadamu ni inshingano yacu mu gutera ibyo biti”.
Umuyobozi w’Akarere wungirije ushinzwe iterambere ry’ubukungu , Matsiko Gonzague, yasabye abaturage b’Umurenge wa Rwimiyaga gufatanya kurwanya ibiza by’umwihariko nk’ahantu hakunda kwibasirwa cyane n’ikiza cy’umuyaga.
Ati:”Muri Rwimiyaga nkuko izina ribyumvikanisha ni Umurenge uhura n’ibiza byumwihariko imiyaga isenya inzu z’abaturage, amashuri kubera ko ari icyôokô cy’imiyaga ituruka ahanini mu bihugu by’abaturanyi ikibasira cyane abaturage ba Rwimiyaga”.
Visi Meya Matsiko arabasaba kubaka ibikorwa bikumira ibyo biza.
Ati:” Umuntu wese wubaka inzu akwiriye kuzirika igisenge cye neza,n’uwubatse yongere asuzume igisenge cye ko kiziritse neza nihaza n’umuyaga usange twubatse neza ibisenge byacu, turasaba rero kugira ngo dufatanye kurwanya ibiza, aho dutuye dutere ibiti hafi y’inzu kuko bigabanya umuvuduko w’umuyaga, ibiti birahari mu tugari mujyeyo mubizane mubitere”.
Minisiteri y’ibikorwa by’ubutabazi(MINEMA) ikangurira uturere twose gukangurira abaturage kwirinda ibiza hagatangwa ubutumwa hajyendewe ku biza byibasira karere runaka. Iyi minisiteri itangaza ko kuva uyu muhindo watangira, ibiza bimaze gusenya inzu 149 byica abantu 20 binakomeretsa 58. Ubu bwoko bw’imiyaga ikomatanyije ituruka ahanini mu bibaya n’ibiyaga byo mu bihugu bya Uganda na Tanzania ishobora kugendera ku bilometero birenga 75 ku isaha.
