Ubuyobozi bw’Akarere ka Ngoma bwagaragaje ko bwubatse inzu 14 zo kubamo nk’amacumbi y’abakozi b’Urwego rwunganira Akarere mu gucunga Umutekano (DASSO), afite agaciro k’amafaranga asaga miliyoni 448 Frw.
Izo nzu zubatswe mu rwego rwo gufasha abakozi ba DASSO kubona amacumbi hafi y’aho bakorera, bityo bakarushaho kuboneka no kwitabira inshingano zo gucunga umutekano igihe bibaye ngombwa.
Ibi byagarutsweho kuri uyu wa 18 Nzeri 2026, ubwo Akarere ka Ngoma kamurikaga ibikorwa n’ibyagezweho mu myaka itanu ishize, kuva mu 2021 kugeza mu 2026.
Umuyobozi w’Akarere ka Ngoma, Niyonagira Nathalie, yavuze ko mbere yo kubaka izi nzu, ubuyobozi bwasesenguye ibibazo byajyaga bigaragara ku bakozi ba DASSO, birimo kuba bamwe babaga ahatandukanye n’aho bakorera.
Yagize ati: “Twarasesenguye tubona ko hamaze kugaragara ibibazo bitandukanye aho aba DASSO batahaga bamushaka umutekano wahungabanye bagasanga nta muriro yabonye, telefone yashizemo umuriro, cyangwa se yaryamye yasinziriye ariko iri cumbi, coordinator wa DASSO aribamo.”
Niyonagira yavuze ko izo nzu zubatswe mu buryo bwa ‘two in one’, ku buryo abakozi ba DASSO b’abagabo bagira aho baba, n’abagore na bo bakagira aho baba.
Yagize ati: “Aha rero, nta rundi rwitwazo aho bakenewe hose bahita bakora kandi aka ni agashya ko mu Karere kacu ka Ngoma nta handi ndakumva.”
Meya Niyonagira yavuze ko iki gikorwa cyahuriranye no kongera umubare w’abakozi bari mu rwego rwa DASSO, kugira ngo bakomeze gufatanya n’ubuyobozi mu kubungabunga umutekano w’abaturage.
Ingabire Jean Claude, Umuyobozi mukuru w’ishami rishinzwe igenamigambi muri Minisiteri y’Ubutegetsi bw’Igihugu, yashimiye Akarere ka Ngoma kuba karashyize imbaraga mu kubaka ubushobozi bw’abakozi, harimo no kubaha amacumbi.
Yagize ati: “Turashimira Akarere ka Ngoma ko urwego rwo kubakira abakozi ubushobozi bakigize intego dushingiye no kuba baraboneye aba DASSO aho kuba, ni ikintu kiza mwakwishimira kuko nta handi kiri, mwakomeje kutugaragariza ko mufite imikoranire myiza.”
Izi nzu zubatswe ari 14, ku buryo buri Murenge w’Akarere ka Ngoma ufite inzu yo kubamo abakozi ba DASSO.
