Ubuyobozi bw’Akarere ka Ngoma hamwe n’Itsinda ry’Abadepite bifatanyije n’abaturage b’Umurenge wa Jarama mu gutunganya ikibuga cy’umupira cyo mu Kagari ka Kibimba aho cyanatewemo ubwatsi mu rwego rwo kubafasha kubona aho bazajya bakorera imikino n’imyidagaduro.
Ibi byabaye kuri uyu wa Gatandatu,tariki ya 25 Werurwe mu muganda usoza ukwezi kwa Werurwe ku kibuga cy’umupira w’amaguru giherereye mu kagari ka Kibimba, mu Mudugudu wa Murama.
Ni kibuga cy’umupira urubyiruko rwo muri kano gace rwasabye Minisitiri w’ubutegetsi bw’igihugu ubwo yari yabasuye muri 2022, basaba ko cyakwitabwaho mu rwego rwo gufasha abahaturiye kwidagadura no kwirinda gukoresha ibiyobyabwenge.
Bamwe mu rubyiruko bavuga ko bari bakennye ikibuga ndetse ko bizabafasha no kuzamura impano za bamwe, ariko banirinda kujya mu ngeso zimwe na zimwe zitari nziza.
Niyingenera Rachid yagize ati: “Hari igihe umuntu yazaga gukina ugasanga harimo ubunyerere wagira ngo wirukankanye umupira ukagwa wicaye, rero kuba badushyiriyemo ibi byatsi bizajya bidufasha umuntu niyitura hasi usange gukomereka bibaye gake. Ikindi, gukora siporo bifasha mu buzima byinshi kuko nk’umwanya wari gutakaza ujya mu bintu bidafite umumaro nko kwiba usanga ahubwo uri kuwubyaza umusaruro.”
Harerimana Abdulkarim na we ati: “Iki kibuga cyari kibi cyane cyari kitubangamiye ariyo mpamvu twanabisabye ubushize, ubu tugiye kuzajya dukina twishimye kandi umwanya wo kunywa ibiyobyabwenge tuzaba twawuzana hano bidufasha kwibagirwa ko binabaho.”
Umuyobozi wa Karere ka Ngoma, Niyonagira Nathalie, yavuze ko kubaka ibikorwaremezo urubyiruko rukenera bifasha mu gutambutsa bumwe mu butumwa bugenerwa abakiri bato ndetse n’abaturage muri rusange.
Yagize ati: “Jarama dufite urubyiruko rukunda imikino cyane kuko bahora mu marushanwa bahiganwa kandi mu by’ukuri cyiba ari n’igihe cyiza nkatwe nk’ubuyobozi tukagira ubutumwa dutanga cyane cyane bwo kwirinda ibiyobyabwenge, inda zitateguwe, kwiteza imbere kuko nta handi dufite ho guhura n’abajeni atari mu bitaramo no mu marushanwa runaka nta mpamvu rero tutabashyigikira.”
Yongeyeho ko ari intambwe ya mbere itewe kandi ko bazakomeza guteza imbere urubyiruko, ati: “Ntabwo tuzaruhuka iki kibuga cyitabaye cyiza, uretse ubuyobozi dufite n’abafatanyabikorwa no muri siporo dore ko hambere hari n’amakipe bambitse harimo n’ikipe ya Jarama yahawe imipira yo gukina, ihambwa imyambaro ya siporo myiza ubu baraseruka neza, ntacyo batwima rero natwe nk’ubuyobozi bw’Akarere ntacyo twabura mu gushyigikira urubyiruko rwacu, ibikenewe by’ibanze tuzakomeza tubafashe.”
Depite Mukamana Elisabeth na we yagize ati: “Iki gikorwa rwose cyadushimishije yaba umuganda twakoze ndetse n’izindi gahunda zose zabaye, mu by’ukuri byatugaragarije ko Jarama muri kwiteza imbere mu buryo bushimishije,murabona twakoze igikorwa cyiza ndetse yaba abaturage n’abayobozi batubwiraga ko abaturage ba Jarama bakunda siporo.”
Yakomeje avuga ko ari igikorwa cy’iterambere ariko kandi gifite akamaro kuko siporo ari isoko y’ubuzima.
Uyu muganda wanitabiriwe n’abandi bagize Inteko ishinga amategeko umutwe w’Abadepite harimo Depite Safari Theoneste, Depite Mpembyemungu Winifrida, Umuyobozi w’Ingabo mu turere twa Ngoma, Kayonza, Kirehe na Bugesera,Col Nzabonimpa Gaetan; Umuyobozi wa Polisi mu Karere Ka Ngoma Gashayija Benjamin n’abandi batandukanye.
