Raporo ya 2025 y’Akarere ka Ngoma igaragaza ko ingo 201 nta bwiherero zigira, izindi 1,121 zikagira ubutujuje ibisabwa; Ubuyobozi bukavuga ko byagaragaye ko hari bamwe banga kubaka ubwiherero bagakoresha ubw’abaturanyi, bukanavuga ko bwihaye igihe cy’ukwezi kugira ngo iki kibazo bagikemure.
Gahunda ya Guverinoma y’u Rwanda iteganya ko buri muturage agomba kuba afite cyangwa akoresha ubwiherero bwujuje ibyangombwa byose kandi busukuye, mu rwego rwo kwirinda indwara ziterwa n’umwanda.
Isesengura ryakozwe n’ishami rishinzwe kureba ibibazo bibangamiye imibereho myiza y’abaturage mu Karere ka Ngoa muri 2024/2025, mu bishya byagaragaye harimo icy’uko ingo 201 nta bwiherero zigira, izigera kuri 41 ikagaragaza ko zatangiye kubucukura.
Igaragaza kandi ko ingo 1,121 zifite ubwiherero bumeze nabi aho imyinshi yiganje mu Murenge wa Jarama ufite izigera kuri 282, Umurenge wa Murama ni 209, Umurenge wa Rukumberi ni 103.
Imibare igaragaza kandi ko ubwiherero 76 bumeze nabi cyane bwashenywe, ubugera kuri 326 bwatangiye gusanwa, ubundi 68 bwarasanwe neza 100%.
Umuyobozi w’Akarere ka Ngoma, Niyonagira Nathalie, yavuze impamvu itera izi ngo kutagira ubwiherero anavuga k ingamba.
Yagize ati: “Iki twagifashe nk’ikintu cyihutirwa, ariko mu by’ukuri ikintu twagiye tubona ni uko hari umuco utari mwiza wo kumva ko niba urugo rwa Papa ruri aha, umusore akubaka iruhande rwo kwa Papa, yakoreshaga ubwiherero bwo kwa Papa. Hakaba n’uwubatse akavuga ngo nzajya nkoresha ubwiherero bw’abaturanyi.”
Meya Niyonagira akomeza agira ati: “Iryo niryo sesengura twakoze, ariko buri rugo ruvutse rugomba kugira ubwiherero; icyo rero kuko twagifashe nk’ikintu cyihutirwa tukirimo kandi mu isesengura twakoze twasanze hari abashoboye kuba babyikorera, abo twabahaye igihe; twihaye natwe igihe cy’ukwezi kugira ngo iki kibazo gikemuke.”
Tariki 19 Ugushyingo 2024, ubwo u Rwanda n’Isi muri rusange bizihizaga Umunsi Mpuzamahanga w’Ubwiherero hagaragajwe ko Abanyarwanda 72% bafite ubwiherero bwujuje ibyangombwa mu gihe 18% batagira ubwiherero bwujuje ibyangomba, harimo ababuhuriraho ndetse na 1% batabufite namba.
