Kuri iki cyumweru, ikipe ya Etoile de l’Est yo muri Shampiyona y’icyiciro cya kabiri mu mupira w’amaguru mu Rwanda yatsindiye Intare F.C ibitego 3-0 kuri sitade ya Ngoma, ikomeza guha ibyishimo abakunzi bayo.
Ni umukino wabereye mu murenge wa Kibungo kuri stade ya Ngoma unitabiriwe n’abakunzi benshi b’izi kipe gusa umukinnyi Songa Isaïe wa Etoile de l’Est atsinda igitego 1-0 mu gice cya mbere.
Mu gice cya 2 amakipe yombi yatangiye ahatanye gusa ku bw’amahirwe umukinnyi wa Etoile de l’Est witwa Boris aba atsinze igitego cya 2-0,
Umukinnyi Boris ku munota wa 74 yongera atsinda igitego cye cya kabiri aha abyishimo abakunzi n’iyi kipe, mu minota ya nyuma iyi kipe yakubise umutambiko w’izamu gusa umupira ntiwajyamo, umupira uza kurangira ari ibitego 3-0 bya Etoile de l’Est.
Mu byishimo byinshi bamwe mu bafana ba Etoile de l’Est baganiriye na MUHAZIYACU bavuze ko bishimiye iyi ntsinzi y’ikipe yabo ikomeje gutsinda amakipe menshi ariko kandi bavuga ko bayisaba kuzazamuka mu cyiciro cya mbere nanone.
Nsengimana Cadet yagize ati: “Intsinzi kuri njye icyo ivuze ni ugukomeza kujya mu cyiciro cya mbere kuko ikibinyereka nuko ikipe yose duhuye nayo tuyitsinda, kandi nizeye neza ko ngomba gukomeza kuko ibyo ubonye iriya n’ikipe ya gatatu bakinishije twabitse ikipe igomba guhangana n’iyo tugomba gukurikizaho.”
Mukamana Clarisse ati: “Nkurikije uko nabonye umukino nta kibazo kandi ikintu twishimira ni uko Etoile itsinda ikaba yajya mu cyiciro cya mbere, nikomeze ikore cyane kugira ngo ibitwereke niba twishimye twishime byo kwishima atari iby’akanya gatoya.”
Tuyisenge Jules ati: “Etoile ikomeje ku dushimisha ahubwo icyo nayisaba ni ukudakora ikosa tukajya mu cyiciro cya mbere nk’uko twagihozemo”.
Umufana w’Intare FC, Tuyihanzamaso Gadi yagize ati: “Intare zacu ntako zitakoze ariko nyine nawe urabizi mu mikino habamo gutsinda no gutsindwa ubutaha nzi ko nitwongera guhura na Etoile tuzayitsinda.”
Umutoza w’ikipe ya Etoile de l’Est uzwi nka Coach Sam ariko akaba yitwa Nsengiyumva Francois yavuze ko bishimiye intsinzi kandi urugendo baganamo ari kuzamuka mu cyiciro cya mbere.
Yagize ati: “Turishimye cyane kuko n’ubundi nicyo twashakaga kandi n’urugendo rwacu kuko aho tugana biradusaba itsinzi kuko nawe urabibona uko twatangiye bamwe batarabimenyera, gusa ubona ko tugenda tuzamuka kandi turashaka kuzamuka mu cyiciro cya mbere.”
Akomeza agira ati: “Ndashimira abafana bacu cyane kuko Ibi bitego dutsinda biva ku murindi wabo kuko nawo uradufasha kandi icyo nabasaba ni ukutuba hafi bakadushyigikira natwe icyo bifuza ibyishimo bashaka tuzakomeza tubibahe.”
Ikipe ya Etoile de l’Est ku mukino ubanza wayihuje n’Intare F.C yayitsinze n’ubundi ibitego 4-1.
