Abantu 16 bafatiwe i Gashanda, mu Karere ka Ngoma mu rugo kwa Shirimpaka Jean Bosco begeranye bari gusenga i saa sita z’amanywa, bishe amabwiriza yo kwirinda ikwirakwizwa ry’icyorezo cya Coronavirusi-COVID-19.
Bafashwe kuri uyu wa Gatandatu, tariki 23 Mutarama 2021, mu Kagari Mutsindo, Umudugudu wa Cyanama, muri gahunda y’ubugenzuzi bw’uko amabwiriza yo kwirinda Covid19 yubahirizwa ikomeje gukorwa n’Ubuyobozi n’inzego z’umutekano..
Umunyamabanga Nshingwabikorwa w’Umurenge wa Gashanda, Buhiga Josue, yabwiye MUHAZIYACU uko byagenze.
Ati: “Twabasanze barimo gusengera kwa Shirimpaka Jean Bosco w’imyaka 60, uyu yari yarigeze kuba Umudivantisite ariko aza kwiyomora kuri iryo torero, basa n’abakora iryabo ritari ryemerwa, we n’abo bari bari kumwe rero barimo abagabo n’abagore 11 n’abana 5 bari barenze ku mabwiriza yo kwirinda Covid19, ni yo mpamvu twabafashe tubegeza ku murenge, kugira ngo tubigishe ariko bacibwe n’amande ateganwa n’amabwiriza y’inama njyanama.”
Ubuyobozi bugaragaza ko amande yagenwe mu Karere ka Ngoma ari uko nyir’urugo rwahinduwe urusengero kandi bitemewe ari ibihumbi 50 by’amafaranga y’u Rwanda, mu gihe buri muntu wafashwe yaje kuhasengera acibwa ibihumbi bibiri.
Mu butumwa Gitifu Buhiga, atanga agira iti: “Turasaba abaturage kwirinda icyorezo cya Covid19 bubahiriza amabwiriza yashyizweho. Kurenga ku mabwiriza ni ugushyira ubuzima bwabo mu kaga. Inama ntizemewe, insengero zirafunzwe, ntabwo gusenga bibujijwe ariko buri muntu yasengera iwe, mu cyumba cye; ntabwo ari byo kujya guhurira ahantu hamwe kuko byatiza umurindi ikwirakwira ry’icyorezo cya Covid19.”
Ibyemezo by’inama y’abaminisitiri iherutse guterana tariki 18 Mutarama 2021, mu mabwiriza mashya yashizweho, arimo n’irivuga ko insengero zose zifunzwe mu rwego rwo kwirinda Covid19.
Mu minsi ishize mu Karere ka Ngoma mu Murenge wa Rukumberi n’ubundi hari abantu basaga 30 hafashwe bari gusengera mu rugo rw’umuntu mu buryo butemewe kandi bacucitse.
Inzego z’Ubuyobozi n’iz’umutekano zivuga ko zizakomeza kugenzura ko amabwiriza yose ashyirwaho mu rwego rwo kwirinda ikwirakwira ry’ubwandu bushya bwa Covid19 yubahirizwa, no guhana abayarengaho hakurikijwe amande n’ibihano byagiye bishyirwaho n’inzego zibifitiye ububasha.
Kuva tariki 16 kugeza ejo hashize tariki 22 Mutarama 2021, imibare itangazwa buri munsi na Minisiteri y’Ubuzima igaragagaza ko mu Karere ka Ngoma muri iyo minsi itandatu abanduye Covid-19 ari 161.
