Umurenge wa Matimba ni umwe mu mirenge y’Akarere ka Nyagatare yegereye umupaka wa Uganda, imirenge yegereye imipaka ni hamwe mu hantu hakunze kugaragarwaho ko hakorerwa ibyaha byinshi birimo ibya magendu, abafutuzi n’ibindi, ku bw’ibyo rero abayobozi batowe b’Imidugudu yo muri uyu murenge bavuga ko bafite intego yo gufatanya n’ubuyobozi bw’Akarere kurwanya no gukumira ibyaha byambukiranya imipaka.
Ibi babigarutseho kuri uyu wa 24 Ukwakira 2026, ubwo muri uyu Murenge wa Matimba, kuri site ya Matimba haberaga amatora hatorwa abayobozi b’inzego z’ibanze z’imitegekere zegerejwe abaturage.
Uwitwa Uwamwezi Hope yatorewe kuba umukuru w’umudugudu wa Matimba ya 3, muri manda ishize yayoboraga mu nzibacyuho avuga ko abaturage basobanukiwe neza gahunda za Leta bityo ko gutorwa kwe bimuha umukoro wo gukomeza guharanira guteza imbere imibereho myiza y’abaturage barwanya ibiyobyabwenge n’abafutuzi babyambutsa z’umupaka kugira ngo ubuzima bw’umuturage burusheho kuba bwiza.
Yagize ati: “Nari nsanzwe ndi Umuyobozi mu nzibacyuho , abaturage bacu bamaze gusobanukirwa na gahunda za Leta, rero ibyo biduha umukoro wo gukora ibishoboka kugira ngo abaturage bacu barusheho kugira ubuzima bwiza, tujya dufasha imiryango itishoboye gutanga mituweli, gusubiza abana mu ishuri n’ibindi dukora tugamije guteza imbere imibereho myiza y’abaturage, dufite umukoro rero wo kurwanya ibiyobyabwenge n’ibindi bikorwa byambukiranya mu buryo butubahirije amategeko byangiza ubuzima bw’abaturage bacu.”
Ruratwa John watorewe kuyobora Umudugudu wa Matimba ya 4 na we avuga ko yari asanzwe n’ubundi ari we uwuyobora, rero ngo mu byo basezeranyije abaturage ni ugusubukura ibyo batari baragezeho birimo nko kunoza neza isuku, kurwanya ibiyobyabwenge, kwesa imihigo basabwa n’Akarere no kujyana abana bose ku mashuri nk’uko Leta ibiteganya.
Yagize ati: “Mu byo twijeje abaturage harimo gukomereza aho twari tugejeje twese imihigo irimo kunoza isuku n’isukura mu Murenge wacu, kurwanya ibiyobyabwenge, kujyana abana bose ku ishuri n’ibindi, rero twabijeje ko ibikigaragaramo imbogamizi ko aribyo tugiye guheraho dukosora kandi twifuza kuba aba mbere mu byo dukora, ni muri uwo mujyo nkatwe nk’abantu duturiye umupaka dukunze kugira imbogamizi z’abantu bakora ibikorwa bitemewe n’amategeko bazwi nk’Abafutuzi, inshingano dufite n’izo gufatanya n’ubuyobozi bwacu bw’Akarere tukarwanya ibi bikorwa byose bitwangiriza abaturage.”
Bamwe mu baturage baganiriye na MUHAZIYACU bagaragaje ko bishimiye amahitamo bikoreye bitorera abayobozi bihitiyemo,
Uwitwa Nzamukosha Eugenie, utuye mu Murenge wa Matimba, Umudugudu wa Matimba ya 3 yagize ati: “Abayobozi twitoreye tubatoye tubishimiye kandi tubitezeho ko batugeza ku iterambere cyane cyane nkatwe nk’abadamu, tubitezeho kandi kwigisha Abanyarwanda gukunda Igihugu no kwigisha abakiri bato agaciro k’ ubunyarwanda, uruhare rwacu nk’abaturage ni ugufatanya nabo gufasha abana bacikishirije amashuri gusubira yo no kubashyigikira mu bindi bikorwa kugira ngo tujyanemo duteze imbere Igihugu cyacu natwe ubwacu, ni ingenzi gutanga amakuru aho tubona bitagenda bityo bikorohereza mu gushaka umuti w’ikibazo.”
Kimwe na Mushayija Charles utuye mu Murenge wa Matimba, Umudugudu wa Matimba ya mbere na we yagize ati: “Turishimira ko aya matora tuyagiramo uruhare nk’abaturage,…Turabasaba kumva ko nkatwe nk’abaturage tubashyigikiye bityo bagakora bibashishikaje, bakubahiriza gahunda zose cyane cyane ku bijyanye n’imibereho myiza y’abaturage, nkatwe duturiye umupaka haba hari ibintu byinshi bitemewe bishobora gukorerwaho rero dufite inshingano zo kubabera ijisho kugira ngo duhashye ibyinjizwa mu Gihugu magendu.”
Muri rusange mu Karere ka Nyagatare muri iki gikorwa cyo gutora abayobozi b’inzego z’imitegekere zegerejwe abaturage n’ay’inama z’Igihugu cyakorewe kuri site zigera ku 169.
