Abanyeshuri 70 biga ku Kigo cy’amashuri abanza cya Kaduha, mu Murenge wa Munyaga, mu Karere ka Rwamagana, bajyanywe ku Kigo Nderabuzima cya Munyaga kugira ngo bitabweho n’abaganga nyuma yo kugira ikibazo cy’ubuzima bikekwa ko gifitanye isano n’ifunguro rya saa sita bariye ku ishuri, kuri uyu wa 23 Ukwakira 2026.
Umunyamabanga Nshingwabikorwa w’Umurenge wa Munyaga, Munyentwari Damascène, aganira na MUHAZIYACU, yemeje ko hari abanyeshuri bajyanywe kwa muganga, asaba abayobozi b’ibigo by’amashuri n’abashinzwe gutegura amafunguro y’abanyeshuri kurushaho kwita ku isuku n’umutekano w’ibiribwa.
Yagize ati: “Ni byo, abanyeshuri 70 bajyanywe kwa muganga kugira ngo bitabweho n’abaganga nyuma yo kugira ikibazo cy’ubuzima cyagaragaye bamaze kurya ifunguro rya saa sita ku ishuri. Turasaba abashinzwe gutegura amafunguro y’abanyeshuri kuyategura bitonze, bubahiriza isuku, bakagenzura ubwiza bw’ibiribwa n’uburyo bitegurwamo, kugira ngo hirindwe ibibazo nk’ibi.”
Yakomeje asaba abayobozi b’ibigo by’amashuri gukurikirana uko amafunguro ahabwa abanyeshuri ategurwa, bakagenzura ko abashinzwe kuyategura bubahiriza amabwiriza y’isuku n’umutekano w’ibiribwa, hagamijwe kurinda ubuzima bw’abanyeshuri.
Yashimangiye ko abayobozi b’ibigo by’amashuri bagomba kugira uruhare mu gukumira ibibazo bishobora guterwa n’amafunguro adateguwe neza, binyuze mu kugenzura uko ategurwa n’uko ahabwa abanyeshuri.
Kugeza ubu, icyateye ikibazo cy’ubuzima cyagaragaye kuri abo banyeshuri ntikiramenyekana neza kuko bisaba isuzuma ry’inzego z’ubuzima kugira ngo hemezwe niba gifitanye isano n’ifunguro bariye.
