Abahinzi bo mu Karere ka Ngoma basabwe kongera gutera imbuto mu mirima aho imyaka yapfuye kubera izuba n’imvura yatinze kugwa, mu gihe ahandi bagirwa inama yo guhinga ibihingwa byera mu gihe gito, birimo ibijumba, kugira ngo babashe kubona umusaruro muri iki gihembwe cy’ihinga cya A 2027.
Bamwe mu bahinzi baganiriye na MUHAZIYACU bagaragaje ko imvura yatinze kugwa yabateye impungenge, kuko hari aho imbuto bari barateye zitameze neza bitewe n’izuba.
Basabye ko ibikorwa byo kuhira byakongerwa kugira ngo bahinge no mu gihe imvura itabonetse.
Uwamariya Lenata, utuye mu Murenge wa Rukira, yavuze ko abahinzi bateye imbuto bizeye ko imvura izakomeza kugwa, ariko ikaza kubura, bituma imyaka imwe n’imwe ipfa.
Yagize ati: “Nk’ubu batubwiye gutera batubwira ngo imvura iraguye, none imvura yarabuze. Ubu imyaka yarapfuye kandi tubona nta cyizere. Bakwiye kongera ahantu ho kuhira, na byo byajya bituma dukoresha amazi mu kuhira.”
Nikuze Domithile wo mu Murenge wa Remera na we yavuze ko izuba ryagize ingaruka ku buhinzi, ariko ko abahinzi bamaze gutegura imirima yabo ku buryo imvura nigwa bazahita batera imbuto.
Yasabye ko amazi yagezwa mu bice bitandukanye kugira ngo abahinzi babashe kuhira imyaka no mu gihe cy’izuba.
Umuyobozi w’Akarere ka Ngoma wungirije ushinzwe iterambere ry’ubukungu, Mapambano Nyiridandi Cyriaque, yavuze ko imvura yatinze kugwa, ndetse n’aho igwiriye ikaba itaraguye neza, ibituma hari imyaka ishobora gupfa. Yasabye abahinzi guhita basubizamo imbuto aho zapfuye.
Yagize ati: “Imvura yatinze kugwa, naho igwiriye iri kugwa nabi, ariko iteganyagihe riratwereka ko hagiye kugwa imvura nyinshi. Nubwo iguye ikererewe, birumvikana ko abamaze gutera hari aho imbuto izapfa, ariko twabagira inama yo guhita basubizamo, cyangwa se bagahita batera indi myaka yerera igihe gito.”
Mapambano yakomeje asaba abahinzi gukoresha ubutaka bwose bushobora guhingwa, bagahitamo ibihingwa byera vuba, birimo ibijumba, kugira ngo babashe kubona umusaruro mu gihe gito, nubwo imvura yaba yaratinze kugwa.
Akomeza agira ati: “Turanasaba y’uko ahantu hose hari ubutaka hakwiye guhingwa kandi hagaterwa imyaka nk’ibijumba n’indi myaka yerera igihe gito cyane. Turimo turakurikiranira hafi, ariko iteganyagihe riratwereka ko mu minsi iza hazagwa imvura. Icyo turi gukora nk’ubuyobozi ni ukuba hafi abaturage, tukareba aho izagwira, ni iki cyaterwa cyasimbura aho byaba byapfuye.”
Mu gihembwe cy’ihinga cya A 2027, mu Karere ka Ngoma hateganyijwe guhingwa hegitari 39.110, harimo hegitari 17.959 ziri mu byanya bigega 224.
