Bamwe mu bagore bacururiza ahazwi nko mu Baha, mu Murenge wa Jarama, Akarere ka Ngoma, bavuga ko isoko ryuzuye ritwaye amafaranga y’u Rwanda miliyoni 42Frw rigiye kubafasha gucuruza batanyagirwa ndetse n’abaturage bakabona aho bagurishiriza umusaruro wabo.
Hari abacuruzi n’abaturage babwiye MUHAZIYACU ko bagiraga imbogamizi z’ahantu bacururiza umusaruro wabo, ariko kuri ubu Akarere ka Ngoma n’abafatanyabikorwa babukiye isoko risakaye rifite imyanya 44 yo gukoreramo.
Ntirembere Jean Pierre, ati: “Icyo twashima cyane, urareba hano hasi habaga harimo ibijumba, ifu, amafi, ibintu byangirika nk’imyaka ariko kuba waba ucururiza ahantu hasakaye, igihe cy’imvura yagwa ntugire ikibazo ukaba wabasha gucuruza ibintu byawe numva ari kintu rizafasha;umuturage agacuruza nta kintu yikanga.”
Muteteri Vestine, ati: “Ubundi twahingaga imbuto n’imboga twabyeza tukabura ahantu tubicururiza kubera ko amasoko ari kure yacu, kugeza uno munsi turimo turacururuza hafi tukabona umusaruro uzagira icyo utugezaho; turishimye kuko iterambere twari dufite rigiye kwiyongera.”
Umuturage, Mukamazera Marie Gloriose, na we yagize ati: “Ubundi twahahiraga kure tukajya Gafunzo hariya Sake, ariko hano iyo umuntu ahinguye araza agacuruza, uhaha agahaha agataha hakiri kare.”
Umuyobozi w’Akarere ka Ngoma wungirije ushinzwe ubukungu n’iterambere, Mapambano Nyiridandi Cyriaque, avuga ko iri soko ryubatswe binyuze mu bufatanye n’umufatanyabikorwa UN Family bamaze iminsi bakorana mu karere, cyane bagafasha koperative yitwa ‘Tuzamurane Kigoma’.
Yagize ati: “Harimo ahantu buhira hakoreshejwe imirasire y’izuba, hanyuma nyuma yo kweza twari dufite ikibazo cy’uko imbuto n’imboga zera muri icyo cyanya cyuhira zitabona aho abantu bazisanga ngo bazigure. Ku bufatanye n’akarere twujuje isoko mwabonye ndetse twaganiriye uburyo rizaguka.”
Akomeza agira ati: “Harimo imyanya igera hafi 44 y’abantu bazacururizamo imboga. Urwo ruhererekane turimo guhuza kugira ngo duhurize ku bantu bamwe kubafasha kugira ngo umuntu ave mu kintu kimwe ajye mu kindi mu rwego rw’iterambere nibyo turimo gukorana n’abafatanyabikorwa.”
Mapamabano asobanura ko iri soko ryuzuye rifite agaciro ka Miliyoni 42Frw habarirwemo ibikorwa byo kuryubaka, ibikoresho n’ubutaka ryubatsweho.
