Mu Rwanda hari abaganga bavura indwara z’abagore barenga 130, ariko uyu mubare uracyagaragaza icyuho mu kubona serivisi zihagije, kuko hari aho umuganga umwe ashobora gukurikirana abarwayi bagera ku 50,000.
Ubuke bw’aba baganga ni kimwe mu bibazo byagarutsweho mu nama ngarukamwaka y’inzobere mu buvuzi bw’indwara z’abagore, aho hagaragajwe ko nubwo uru rwego rugenda rutera imbere, hakiri byinshi byo gukorwa kugira ngo serivisi zigere ku babakeneye ku buryo bworoshye.
Umubare muto w’abaganga ugereranyije n’abakeneye serivisi ushobora gutuma abarwayi bategereza igihe kirekire, cyane cyane mu bitaro byakira abantu benshi. Ikindi kandi, ubwinshi bw’abarwayi bashobora gutuma abaganga bakora mu bihe by’umunaniro ukabije.
Hari aho bivugwa ko umuganga umwe ashobora kuvura cyangwa gukurikirana abarwayi bagera ku 50,000, ibintu bigaragaza uburemere bw’icyuho kiri mu bakozi bazobereye muri uru rwego.
Iki kibazo kandi gishobora kugira ingaruka ku baganga ubwabo, kuko umutwaro munini w’akazi ushobora gutuma bamwe bahitamo kujya gukora mu mavuriro yigenga cyangwa kwikorera ku giti cyabo.
Kugira ngo iki cyuho kigabanuke, u Rwanda rwashyize imbaraga muri gahunda ya 4×4, igamije gukuba kane umubare w’abakozi bo mu rwego rw’ubuzima.
Muri iyi gahunda, hanongerewe umubare w’abanyeshuri biga ibijyanye no kuvura indwara z’abagore, ububyaza n’ubuforomo. Intego ni ukongera abakozi bashya binjira muri uru rwego no koroshya uburyo abaturage babona serivisi.
Ikoranabuhanga na ryo riri mu bisubizo biri gushakishwa. Gukoresha Telemedicine bishobora gufasha abaganga gukorana n’abakozi b’ubuzima bari mu bindi bice by’Igihugu, bityo abarwayi ntibahore basabwa kujya kure kugira ngo babone ubujyanama cyangwa serivisi runaka.
Nubwo hakiri icyuho mu mubare w’abaganga, imibare yerekana ko u Rwanda rumaze gutera intambwe mu kugabanya imfu z’ababyeyi bapfa babyara.
Ubushakashatsi bwa karindwi ku Mibereho n’Ubuzima mu Rwanda, DHS 2025, bwagaragaje ko umubare w’ababyeyi bapfa babyara wagabanutse ugera kuri 149 ku babyeyi 100,000 babyaye, uvuye kuri 203 ku 100,000 mu 2020.
U Rwanda rwihaye intego yo kugabanya uyu mubare ukagera kuri 126 ku babyeyi 100,000 babyaye mu 2030.
Kongera abaganga b’indwara z’abagore ni kimwe mu byafasha gukomeza kugabanya imfu z’ababyeyi no kunoza serivisi z’ubuzima bw’imyororokere.
