Umuyobozi w’Akarere ka Kayonza Nyemazi John Bosco arasaba urubyiruko gukoresha neza imbuga nkoranyambaga bagaragaza ibitekerezo byahindura benshi; akagaragaza n’uko byaba n’igisubizo cyo kurwanya ibiyobyabwenge.
Mu turere tw’Intara y’Iburasirazuba hamaze iminsi hari gishingwa amahuririro y’abakuze n’urubyiruko, hagamijwe gucyeburana no kwigira ku byakozwe hasigasirwa ibyagezweho; bakanubaka ubufatanye mu rugendo rw’iterambere.
Kimwe mu bibazo bibangamiye urubyiruko rwo mu Karere ka Kayonza bivugwa n’uru rubyiruko ni ikoreshwa ry’ibiyobyabwenge, aho bemeza ko inzego za Leta zifatanyije n’ababyeyi bakwiye gushyira imbaraga mu guhagurukira iki kibazo.
Umuyobozi w’Akarere ka Kayonza Nyemazi John Bosco avuga ko ingamba zihari zo kurwanya ibiyobyabwenge mu rubyiruko ari nyinshi, ariko bigasaba n’urubyiruko ubwarwo guhindura imyumvire kandi rukabifashwamo na rugenzi rwarwo.
Meya Nyemazi akomeza asobanura ko ibiganiro bihuza abato n’abakuru ndetse n’inzego za Leta zabigizemo uruhare biri mu bishyirwamo imbaraga, ati: “Guhuza imbaraga mu kurwanya ibiyobyabwenge bishingiye ku biganiro hagati y’abakuze n’abato ibyo babona ku myitwarire idasanzwe mu muco wacu, urubyiruko rukwiye gukoresha neza imbuga nkoranyambaga bagakora amagurupe manini yagira uruhare mu guhindura imitekerereze n’imigenzereze y’abantu.”
Akomeza agira ati: “Izi mbuga nkoranyambaga zibaho byinshi na benshi, zikoreshejwe neza zaramira byinshi birimo umuco ndetse zikanaganirirwaho za kirazira.”
Kwizera Jean Luc uri mu cyiciro cy’urubyiruko, na we yagize ati: “Hakenewe guhuza urubyiruko mu mahuriro atandukanye bakagira byinshi bahigira kandi bigakorwa barusanze aho ruri, hari nk’ibigo by’urubyiruko ariko abenshi kuri ubu tuzi aho twabasanga ni ku mbuga nkoranyambaga.”
Ikindi urubyiruko rugarukaho ni ugukebura abakuze bakumva ko barerera u Rwanda ntibabone aho abana bangirika bishoye mu biyobyabwenge ngo babareke, nk’uko Niyitegeka Kizito wo mu Murenge wa Mukarange abivuga,
ati: “Hari urubyiruko ruri mu biyobyabwenge kandi abakuru ntacyo babikozeho, usanga umwana ajya kugura kore ahantu hakorera umuntu mukuru, usanga umwana ataha yasinze ntihagire ubimubaza, hari n’aho usanga abana n’ababyeyi basangira inzoga; ibi byose bikwiye kuganirwaho buri wese akamenya uruhare rwe mu kurinda uru Rwanda.”
Umunyabanga mukuru ku rwego rw’Igihugu w’umuryango w’abari mu zabukuru mu Rwanda (ARR) Batamuriza Jeanne d’Arc avuga ko abagize iri shyirahamwe biyemeje kwegera uru rubyiruko bakarufasha gusobanukirwa no kwirinda ibiyobyabwenge kugira ngo bazagire ejo hazaza heza, aho kuri ubu mu Karere ka Kayonza hamaze gushyirwaho ihuriro ry’abari mu zabukuru n’urubyiruko biyemeje gukora umushinga wo korora ingurube bafatanyije ukazaba n’umwanya wo kuganira ku bindi bibazo byugarije urubyiruko n’uko byashakirwa umuti urambye.
