Umutoza w’Ikipe ya Bugesera FC , Umurundi Masudi Djuma yavuze ko igituma ikipe abereye umutoza ya Bugesera FC itari kwitwara neza biri guterwa no gukoresha imyitozo imipira ishaje itakigezweho, bagera mu mukino bagakinisha imipira igezweho; bikagora abakinnyi be.
Ibi yabivuze Kiri uyu wa Gatanu nyuma y’umukino wahuje Bugesera FC na AS Kigali. Uyu mukino ukaba wabereye mu Karere ka Bugesera imbere y’abafana na Bugesera FC.
Amakipe yombi yakinnye umukino unogeye ijisho ariko birangira anganyije ubusa ku busa. Ikipe ya Bugesera ntiyahiriwe n’igice cya mbere kuko yokejwe igitutu na AS Kigali ariko bikarangira itabonye igitego. Mu gice cya kabiri Bugesera yayoboye umukino ariko iminota 90 irangira nta kipe n’imwe ihindukije umunyezamu.
Nyuma yo kunganya uyu mukino umutoza wa Bugesera Masudi Djuma akaba yatangaje ko atanyuzwe no kunganya kuko bari bafite umukino mu ntoki.
Yagize ati: “Gahunda yacu yari iyo kubananiza, mu gice cya mbere twabikoze ariko ntitwashobora kubyaza umusaruro amahirwe arenga arindwi twabonye.”
Masudi Djuma yakomeje agira ati : “Turatakaje ariko njye nashakaga kubatuma kuri komite ngo batugurire imipira yo gukoresha imyitozo kuko biratugora gukina. Imipira dufite ni ibipira bitakigezweho ubanza ari yo ku gihe cya Hitler, mwarabibonye ko ku mukino wa APR FC twatsinzwe kubera gukina imipira tutamenyereye. Rwose komite nigure imipira yo gukina”.
Mu yindi mikino yabaye Etincelles yanganyije na APR FC igitego 1-1, Rayon Sport itsinda Espoir 3-0, Heroes inganya na Marine 0-0.
