Mu Karere ka Gatsibo hatashywe umuyoboro munini w’amazi wa Minago, ni igikorwa cy’umuhigo w’Akarere ka Gatsibo ukaba utashywe mu cyumweru cyahariwe ibikorwa byo kwibohora.
Kuri uyu wa 29 Kamena mu Murenge wa Gatoki, Umunyamabanga wa Leta muri Minisiteri y’Ubutabera Nyirahabimana Solina, ari kumwe n’Umuyobozi w’Akarere Gasana Richard, abahagarariye World Vision bashyikirije abaturage ba Minago umuyoboro w’amazi bubakiwe.
Umuyoboro w’amazi wa Minago ni umuyoboro ufite ibirometero 99.8 ukaba uzageza amazi meza ku baturage bo mu mirenge ya Kabarore, Gitoki, Rugarama na Remera ukazagera ku baturage 27,447.
Bamwe mu baturage bashyikirijwe aya mazi bashimira leta ko yaborohoreje kubona amazi meza, Mutuyimana Vangeline yagize ati: “Badukoreye cyane kuba twegerejwe amazi, nawe urabyumva ni iterambere ryatugezeho, kuri ubu ni ubuzima bwiza bwatugezeho.”
Undi muturage wo mu Umudugudu wa Gahabo mu Kagari ka Nyamirama yagize ati: “Ubu nta kibazo cy’amazi tuzongera kugira turashimira cyane Nyakubahwa Perezida wa Repubulika Paul Kagame, wadutekerejeho tukagerwaho n’amazi meza, mbere twari tubayeho nabi kubona amazi byaratugoraga ku buryo utari afite imbaraga yishyuraga abayamuvomera ‘ibuni’ imwe akayishyura amafaranga 100.”
Nsengiyumva Aimable ni umukozi wa World Vision wari uhagarariye uyu muryango muri iki gikorwa, avuga ko aya mazi yahawe abaturage babikomora ku buyobozi bwiza bw’u Rwanda, ni nyuma y’uko umuyobozi wa World Vision ku isi yaje akabonana na Perezida wa Repuburika y’u Rwanda Kagame Paul,, bakemeranywa ko World Vision yemeye gufasha abaturage bakegerezwa amazi meza mu nzira yo kugira ubuzima bwiza ku muturarwanda.
Umuyobozi w’Akarere ka Gatsibo Gasana Richard hamwe n’abaturage biyemeje kuzafata neza amazi bahawe, akabafasha kurushaho kugira imibereho myiza abizeza ko aya mazi atazabahenda dore ko ijerekani imwe y’amazi izajya igura amafaranga 20
Minisitiri Nyirahabimana Solina yibukije abaturage ko bagomba kurinda no kubungabunga uyu muyoboro, amazi bahawe bakazayakoresha neza, yagarutse kandi ku ntego yo kubona amazi meza ku baturage kandi amazi abegereye, yagize ati: “Mu mwaka wa 2017 Nyakubahwa Perezida wa Repubulika yemereye abaturage bose ko mu mwaka wa 2024 bazagerwaho n’amazi ku buryo batarenga metero 500, none ubu imvugo niyo ngiro kuko mwe abaturage bo muri iyi mirenge mwagezweho n’amazi.”
Minisitiri Nyirahabimana akomeza ashimira buri wese wagize uruhare rw’abatanyabikorwa n’Akarere ka Gatsibo kugira ngo babone amazi meza.
Imirimo yo kubaka umuyoboro w’amazi wa Minago watwaye amafaranga y’u Rwanda angana na 1,876,237,310Frw. Aho uruhare rw’Akarere ari 33% (619,158,312Frw). Umufatabyabikorwa World Vision rukaba 67% (1,257,078,998Frw) uyu muyoboro utanga amazi ku baturage 27.447 bo mu mirenge ya Gitoki, Kabarore, Rugarama na Remera, Ufite uburebure bwa 99.8Km n’amavomo 72.
