Umuyobozi w’Akarere ka Ngoma, Niyonagira Nathalie, yavuze ko umunsi wo Kwibohora utagomba gufatwa nk’umunsi wo kwibuka amateka gusa, ahubwo ari umwanya wo gusuzuma aho Igihugu n’abaturage bageze mu rugendo rw’iterambere no kongera kwiyemeza kubaka ejo hazaza heza.
Yabivuze kuri uyu wa 4 Nyakanga 2026, mu birori byo kwizihiza ku nshuro ya 32 umunsi wo Kwibohora, byabereye mu Karere ka Ngoma, aho hanatashywe ku mugaragaro umuhanda wa Nyaruvumu–Gahushyi–Gituku
Umuyobozi w’Akarere ka Ngoma Niyonagira Nathalie, yavuze ko Kwibohora kwahinduye amateka y’u Rwanda, kuko kwazanye ubumwe, amahoro n’iterambere Igihugu gikomeje kwishimira, ati: “Kwibohora twibuka ubutwari bwaranzwe n’Inkotanyi, aho zahaye ubumwe n’iterambere Igihugu cyacu gifite. Kwibohora ntabwo ari amateka gusa, ahubwo ni umwanya wo gusuzuma aho tugeze twubaka Igihugu no gusuzuma urugendo rwo kwiteza imbere, kwigira no guteza imbere abaturage.”
Yagaragaje ko Akarere ka Ngoma kamaze gutera intambwe zifatika mu nzego zitandukanye zifasha imibereho myiza y’abaturage.
Ati: “Mu Karere ka Ngoma twishimira intambwe tumaze gutera, haba mu kongera umusaruro, kwagura ibikorwaremezo birimo imihanda, amashanyarazi, guteza imbere ubuvuzi n’uburezi, byose bishyigikira iterambere ry’abaturage.”
Nubwo yagaragaje ibyo akarere kamaze kugeraho, Meya Niyonagira yavuze ko hakiri urugendo rwo gukomeza guteza imbere ubukungu bushingiye ku musaruro n’ihangwa ry’imirimo.
Yagize ati: “Nubwo hari ibyo tumaze kugeraho, turacyafite urugendo mu guteza imbere ubuhinzi, ubworozi, inganda n’ubucuruzi, duhanga imirimo iteza imbere abaturage.”
Meya Niyonagira yanibukije ko kurinda ibyagezweho ari inshingano ya buri wese, asaba urubyiruko gukomeza kugira uruhare mu iterambere ry’akarere no guhanga udushya, Ati: “Ubuyobozi dufite inshingano ikomeye yo kurinda ibyagezweho, turwanya ingengabitekerezo ya Jenoside, turasaba urubyiruko gukomeza kugira uruhare mu iterambere ry’akarere kacu bahanga udushya.”
Mu rwego rwo kwizihiza Umunsi wo Kwibohora, hanatashywe ku mugaragaro umuhanda wa Nyaruvumu–Gahushyi–Gituku ufite uburebure bwa kilometero 9, wubatswe utwaye 1.073.633.913 Frw. Biteganyijwe ko uyu muhanda uzarushaho korohereza abaturage n’abacuruzi mu ngendo, guteza imbere ubuhahirane no kwihutisha iterambere ry’ubukungu bw’Akarere ka Ngoma.
Abitabiriye ibirori bagaragaje ko imyaka 32 yo Kwibohora yabaye umusingi w’impinduka zigaragara mu mibereho y’Abanyarwanda, banashimangira ko gukomeza kubungabunga amahoro, ubumwe n’umutekano ari byo bizatuma iterambere rikomeza gusigasirwa.
