Mu mpera z’iki cyumweru mu Karere ka Kirehe harabera irushanwa ‘Gisaka International tournament’ ry’umukino wa Volleyball ritegurwa n’Akarere ka Kirehe rizitabirwa n’amakipe yo mu cyiciro cya mbere mu Rwanda n’abahoze bakina uyu mukino.
Riteganyijwe kuri uyu wa Gatandatu tariki 20 no ku cyumweru tariki 21 Kanama 2022 mu Karere ka Kirehe.
Amakipe azitabira iri rushwanwa ni asanzwe akomeye akina mu cyiciro cya mbere(Division 1) harimo amakipe 11 y’abagabo, n’amakipe 10 y’abagore.
Ryitabirwa kandi n’amakipe y’abakuze bahoze ari abakinnyi ba Volleyball(Aba veterans), rikanatumirwamo amakipe yo mu bihugu byo mu muryango wa Africa y’Iburasirazuba.
Umuyobozi w’Akarere ka Kirehe wungirije ushinzwe iterambere ry’ubukungu Nzirabatinya Modeste aganira na MUHAZIYACU yacu yakomeje ku ntego y’iri rushanwa ritegurwa n’Akarere ka Kirehe,
At: “Ryitabirwa n’amakipe yo muri Division 1 n’ Aba veterans, rikorwa mu rwego rw’ubukangurambaga no kuzamura impano za Volleyball, kandi ubu ryabaye mpuzamahanga.”
Ubuyobozi bw’Akarere ka Kirehe bugaragaza ko kugeza ubu imyiteguro y’iri rushanwa imeze neza ku buryo yaba amakipe azaryitabira n’aho azajya akinira ku bibuga bya Nyakarambi, ES Rusumo na Akagera Inter. School byose biteguye neza; bugahamagarira n’ Abanyakirehe kwitabira iyi mikino.
Biteganyijwe ko amakipe azatsinda azajya ahembwa mu byiciro bitandukanye birimo guhemba amakipe atatu ya mbere muri buri cyiciro(Abagore n’abagabo); no guhemba abakinnyi bitwaye neza mu mikino.
Irushanwa rya ‘Gisaka International Tournament’ risanzwe ritegurwa n’ubuyobozi bw’Akarere ka Kirehe bufatanyije na Federasiyo ya volleyball mu Rwanda kuva 2015.
Akarere ka Kirehe gasanzwe gafite ikipe ya Volleyball mu kiciro cya mbere(Division 1).
