Ubuyobozi bw’Akarere ka Kirehe ku bufatanye na Minisiteri ishinzwe ibikorwa by’ubutabazi (MINEMA) bafunguye ku mugaragaro inzu y’ubucuruzi yiswe ‘Mahama Business Center’ yuzuye itwaye miliyoni 350 z’amafaranga y’u Rwanda.
Ni inzu yubatswe mu Murenge wa Mahama, aho abayicururizamo barimo abanyarwanda ndetse n’impunzi zaturutse mu bihugu bitandukanye, birimo u Burundi, Repubulika Iharanira Demokarasi ya Congo ndetse na Sudani y’Epfo ziri mu nkambi ya Mahama.
Abacuruzi bagiye gukorera ubucuruzi bwabo muri iri soko bavuga ko rigiye kubafasha kwiteza imbere kuko mbere bakoreraga aho babonye, bikabateza ubujura kubera ko bakoreraga mu kavuyo.
Niyogusenga Jonathan utuye mu nkambi ya Mahama, akaba acuruza ibikoresho by’ikoranabuhanga yagize ati: “Ubundi mbere bataraduha iri soko, ubuzima bwabaga bugoye kuko ntabwo twabonaga aho gukorera. Ikindi, abaguzi ntabwo bazaga, ariko kuva baduhaye iri soko ni ibintu byiza cyane, bigiye gutuma dukora tukiteze imbere.”
Nyiranzabahimana Venancia yagize ati: “Iri soko rikemuye byinshi, kuko twajyaga dusiga ibintu bakabyiba, kubera ko twakoreraga hanze. Ubu rero ibintu bigiye kugenda neza kuko baduhaye isoko ryiza.”
Nshimirimana Amisa utuye mu nkambi ya Mahama, yagize ati: “Nubwo ndi impunzi, ariko naje gufatanya na bagenzi banjye bari hano inyuma y’inkambi, ubundi iri soko ritarubakwa ubuzima bwari gahoro gahoro, gusa ubu turakora twisanzuye. Mu minsi mike ibintu bizaba bimeze neza kuko abantu batangiye kugenda bahamenyera. Turishimye cyane.”
Umunyamabanga uhoraho muri Minisiteri Ishinzwe Ibikorwa by’Ubutabazi, (MINEMA) Habinshuti Philippe avuga ko iri soko rigiye kuzamura imibereho myiza y’abaturage by’umwihariko impunzi ziri mu nkambi ya Mahama.
Yagize ati: “Iri soko rigiye kwihutisha ibikorwa byari bisanzwe bihari byo kuzamura imibereho myiza y’impunzi n’abazicumbikiye, binyuze mu kuzamura ibikorwa byo kwikorera. Hano hari gukorerwa ibikorwa by’ubucuruzi, n’ubukorikori bikaba biri muri gahunda twatangiye yo kuvuga ngo izi mpunzi ziri hano zaje gusaba ubuhungiro muri iki gihugu, zirabubona, ziratekanye, gusa ntabwo zikwiye kubaho buri gihe zitegereje inkunga.”
Yakomeje avuga ko ibikorwa byo gufasha impunzi kwiteza imbere bitarangiriye hano, ahubwo ko bagiye no gukomeza kuzifasha gukora ubucuruzi hirya no hino mu Gihugu.
Ati: “Ku bufatanye na Banki y’Isi, turi gushaka kwagura ibikorwa, by’umwihariko ibyongera ubumenyi. Iyo uje gukora hano ufite ubumenyi biragufasha cyane mu buryo bwinshi butandukanye.”
Yashimangiye ko Igihugu cy’u Rwanda nta muntu n’umwe giheza, ushaka gukora wese hatitawe ku gihugu akomokamo, amarembo afunguye.
Ati: “Igihugu cyacu gihora gifunguye amarembo kuri buri wese, ukeneye umutekano, ukeneye gukora. Ntabwo ari ibihugu duturanye gusa ahubwo n’ibindi bihugu byo hirya iyo bibazanye turabakira, kandi bakabana neza nabo bahasanze.”
Mahama Business Center izajya ikorerwamo ibikorwa bitandukanye biteza abaturage imbere, kugeza ubu abayikoreramo nta mafaranga y’ubukode bishyura buri kwezi, gusa ubuyobozi bwavuze ko bagomba kwiyubaka nabo bakigira. Ikaba iri gukoreramo abacuruzi barenga 150.
