Mu kwizihiza umunsi mpuzamahanga w’urubyiruko ku rwego rw’Akarere ka Kirehe, byabereye mu Murenge wa Musaza urubyiruko rwakoze umuganda wo kubumba amafatari yo kubakira inzu umubyeyi w’abana batatu witwa Ayibazibwe Viollette utari ufite aho kuba.
Kuri uyu wa 17 Kanama i Musaza, mu Kagari ka Mubuga, Umudugudu wa Kanombe, ni ho ku rwego rw’Akarere hizihirijwe uyu munsi mpuzamahanga w’urubyiruko ku nsanganyamatsiko igira iti: “Ikoranabuhanga mu rubyiruko, inzira yo kwihutisha iterambere rirambye”. Uyu umunsi usanzwe wizihizwa tariki 12 Kanama buri mwaka, guhera mu 1999.
Waranzwe n’ibikorwa by’umuganda wo kubumba amatafari, umukino w’umupira w’amaguru n’ubutumwa butandukanye.
Ayibazibwe Viollette w’imyaka 35 wo mu Mudugudu wa Kanombe wahawe umuganda yabwiye MUHAZIYACU ko kuri ubu abayeho acumbika kandi mu buzima bugoye ku buryo kubona inzu yo kubamo bizaba ari ingenzi kuri we.
Ati: “Mfite abana batatu, mbayeho mu buzima bugoye ariko kuba urubyiruko n’abaturage baje kumpa umuganda wo kunyubakira ndabyishimiye cyane. Nari nshumbitse no kubona ibyo kurya birangora, gusa nimbona aho kuba hanjye noneho no gukora nkiteza imbere bizakunda.”
Uwihagazeho Enock, Umuhuzabikorwa w’Inama y’Igihugu y’urubyiruko mu Murenge wa Musaza avuga ko iyi nzu barayikurikirana kugeza yuzuye,
Ati: “Nk’uko uruhare rwacu nk’urubyiruko ari ugukoresha imbaraga zacu mu iterambere ry’Igihugu, niyo mpamvu twanakoze uyu muganda kandi nubwo ari igikorwa gitangiye tubumba amatafari, biri mu muhigo dufite wo kubakira abatishoboye; tugiye gukomeza iki gikorwa kugeza iyi nzu tuyirangije.”
Mukandayisenga Janviere, Umuyobozi w’Akarere ka Kirehe wungirije ushinzwe imibereho myiza y’abaturage, yashimiye abaturage biganjemo urubyiruko bitabiriye umuganda, abizeza ko inzu nigera aho gusakarwa Akarere kiteguye gutanga isakaro.
Mu butumwa yatanze bujyanye n’insanganyamatsiko y’umunsi mpuzamahanga w’urubyiruko, igaruka ku gukoresha ikoranabuhanga nk’inzira yo kwihutisha iterambere rirambye, yagize ati: “Mwitabire gukoresha neza ikoranabuhanga kuko ubu serivisi nyinshi ziratangwa mu ikoranabuhanga, murikoreshe neza mushaka amakuru mwiyungure ubumenyi, telefone muzikoreshe neza, mwishyurane cyangwa mwohererezanye amafaranga mukoresheje ikoranabuhanga.”
“Ikoranabuhanga ridufasha nk’urubyiruko kwihangira umurimo, kandi ryihutisha iterambere kuko rituma dukoresha igihe gito n’amafaranga make. Turifuza urubyiruko ruteye imbere kandi rufite ubuzima bwiza.”
Visimeya Mukandayisenga kandi yasabye urubyiruko kwirinda kurangazwa n’ibintu bidafite akamaro bicishwa mu ikoranabuhanga, kwirinda kwishora mu biyobyabwenge no gukumira no kwirinda inda ziterwa abangavu; ndetse no kugira amakenga bakirinda gushukwa hakoreshejwe ikoranabuhanga.
Ibarura rusange ry’abaturage ryo muri 2022 ryagaragaje ko mu baturage basaga ibihumbi 460 batuye mu Karere ka Kirehe, abari mu cyiciro cy’urubyiruko basaga ibihumbi 120.
Biteganyijwe ko mu rwego rwo kwizihiza uyu munsi mpuzamahanga w’urubyiruko, hirya no hino mu Gihugu hazakorwa ibikorwa bitandukanye by’imirimo y’amaboko n’ibindi by’ubukorerabushake guhera kuri iyi tariki 17 kugeza 31 Kanama 2024.
