Abakandida depite bazahagararira Intara y’Iburasirazuba mu myanya 30% yahariwe abagore mu Nteko Inteko Ishinga Amategeko, basabwe ko abazatorwa bazita cyane ku bibazo by’amakimbirane yo mu ngo byugarije umuryango nyarwanda.
Abo bakandida depite mu cyiciro cy’imyanya 30% yahariwe abagore bakomeje ibikorwa byo kwiyamamaza mu Karere ka Kirehe, kuri uyu wa Gatandatu tariki 06 Nyakanga 2024.
Ni igikorwa cyakorewe mu busitani bw’Akarere ka Kirehe, aho muri 46 biyamamazaga buri wese yahabwaga iminota 4 akavuga imigabo n’imigambi ye, imbere y’inteko ibatora.
Hari abagarukaga ku kuba nibatorwa bazaharanira ko muri aka karere hongerwa ubuso bwuhirwa, kuzamura iterambere ry’umuryango, guharanira kugira ingo zitekanye, kurandura imirire mibi, gukumira inda ziterwa abangavu, gufasha abagore n’ibindi byiciro guhanga imirimo, kuzamura urwego rw’ubuhinzi n’ubworozi bukozwe kinyamwuga n’ibindi.
Bamwe mu bagize inteko itora baje kumva ibyo aba bakandida depite bazabagezaho, mubyo banasabye ko byazitabwaho cyane n’abadepite bazatorwa muri iki cyiciro ni ukuzita cyane ku bibazo byugarije umuryango birimo amakimbirane.
Muhawenimana Solange wo mu Kagari ka Nyabikokora mu Murenge wa Kirehe yagize ati: “Abiyamamaje nanyuzwe n’imigabo n’imigambi yabo kuko yangeze ku mutima, ubusanzwe ndi mwarimukazi, iyo urebye usanga ibibazo bigaragara henshi birimo inda ziterwa abangavu, guta ishuri ku bakira bato, gatanya za buri munsi n’ibindi nyinshi. Ibyo byose iyo urebye bituruka ku makimbirane yo mu miryango, icyo tubasaba rero mu gihe baba batowe bazita kugushaka igisubozo kirambye ku makimbirane yo mu ngo.”
Uwaritatse Eline utuye mu Murenge wa Gahara yagize ati: “Imigabo n’imigambi yabo numvishe ihamye kandi igamije ineza ku baturage, icyo nabatuma kandi mbifuzaho nk’umugore uri mu nteko itora nuko batajya kwicara mu nteko, ahubwo bazashireho amategeko kandi bayashyire mu bikorwa agamije gushaka igisubizo mu makimbirane yo mu ngo, imiryango ibane mu mahoro; nibyo bizatuma n’imibereho iba myiza muri rusange.”
Umukozi wa Komisiyo y’Igihugu y’Amatora mu Ntara y’Iburasirazuba, Kayiranga Frank, avuga ko ibikorwa byo kwiyamamaza byagenze neza aho banyuze yibutsa abakandida depite mu cyicaro cyihariye cy’abagore bazatorwa kuzashyira mu bikorwa imigabo n’imigambi yabo.
Yagize ati: “Aho twahereye ibikorwa cyo kwiyamamaza kirimo kiragenda neza ibiduha n’icyizere ko n’amatora azagenda neza, imigabo n’imigambi bagaragaza ku bagize inteko bigaragaza ibyo bazageza ku baturage, tuributsa abagize inteko itora kuzatora neza, bakirinda ko hari ijwi ryaba imfabusa.”
Inteko Ishinga Amategeko y’u Rwanda iba igizwe n’abadepite 80, bagomba kuba barimo abagore 24 baharirwa 30% batorwa by’umwihariko.
Amatora yihariye y’abagore bagize 30% by’abagize inteko ishinga amategeko umutwe w’Abadepite azaba tariki 16 Nyakanga 2024.
Muri aba 46 bari kwiyamamaza mu Ntara y’Iburasirazuba hagomba gutorwamo 6.
