Ubuyobozi bw’Akarere ka Kirehe bushima uruhare rw’abagore mu iterambere ry’aka Karere haba mu buhinzi n’ubworozi, gusubiza ku ishuri abana barivuyemo, guhanga amatsinda mato no kuyakurikirana; no kwita ku muryango.
Ibi byagarutsweho kuri uyu wa 28 Kanama 2025 ubwo muri aka Karere haberaga inama rusange y’inama y’Igihugu y’abagore, ifite insanganyamatsiko igira iti: “Umuryango utekanye inkingi y’imibereho myiza n’iterambere rirambye”.
Ni Inama y’Igihugu y’Abagore, yitabiriwe n’abagore baturutse mu mirenge itandukanye yo mu Karere ka Kirehe yose uko ari 12.
Iyi nama, yabaye hishimirwa ibyo ba mutima w’urugo bagezeho mu mwaka wa 2024-2025 bareba uko imihigo yo muri uyu mwaka yesejwe, byagaragaye ko bayesheje ku kigero cya 98.5%.
Mu mwaka wa, 2024-2025 Inama y’igihugu y’abagore igaragaza ko yakoze ibikorwa bitandukanye birimo kwigisha abagore n’abakobwa 108 bo mu mirenge itandukanye, kongerera imbaraga amatsinda 55 ari mu mudugudu ntangarugero, arimo 43 abitsa akanabikuza akoresheje ikoranabuhanga.
Hubatswe amazu abiri, hakurungiwe amazu 36, n’ubwiherero 45. Hubatswe uturima tw’igikoni 826, hatewe ibiti by’imbuto z’iribwa 1209, hubatswe udutanda tw’amasahani 240, hasuwe imikorere y’amarerero ndetse n’igikoni cy’umudugudu, ababyeyi bigishwa uko bategura indyo yuzuye. Hakozwe ibikorwa byo kuremera imiryango itishoboye 106 hagamijwe kububakira ubushobozi no kubafasha kwikura mu bukene; n’ibindi bitandukanye.
Umuyobozi w’Akarere ka Kirehe Ragira Bruno yasobanuye ko iterambere ry’akarere rishingiye ku bagore, bitewe n’ibikorwa bakora,
Yagize ati: “Iyi nteko rusange ibaye hari byinshi twishimira mu Karere ka Kirehe, kuko kuri ubu imibereho y’abaturage yagaragaje ko akarere kacu kateye intambwe igaragara mu kwikura mu bukene, ubu twageze kuri 14% tuvuye kuri 26%, murumva ko ari ibintu byo kwishimira. Abari mu murongo w’ubukene bari hasi cyane, uruhare rw’abagore mu Karere kacu ni uruhare rukomeye cyane, buriya ubukungu bw’Akarere bugizwe n’abagore.”
“Aya mahirwe mwahawe n’Igihugu mukwiye kuyasigasira, kandi nizera ko n’ibindi bibazo mukwiye kubikemura. Turacyafite ikibazo cy’imiryango ibana mu makimbirane, mukomeze mushyiremo imbaraga muyarwanye kandi aho muzadukenera turahari.”
Bamwe mu bagore baganiriye na MUHAZIYACU bavuga ko koko bagaragara mu bikorwa bitandukanye biteza imbere akarere.
Kayitesi Consolate yagize ati: “Abagore bo muri Kirehe twateye imbere cyane, nkanjye mfite kompanyi ubu nkorana n’ibigo by’imari baranyizera bakanguriza. Ubu natwe dufasha abandi bagenzi bacu kuko turitanga cyane tugafasha bagenzi bacu batishoboye tukabubakira ubwiherero. Abagitega amaboko abagabo babo bakwiye gutinyuka bagakora bakegera amabanki bagakora bakiteza imbere.”
Mukeshimana Anathalie umuhuzabikorwa w’inama y’Igihugu y’abagore mu Murenge wa Nyamugari, yagize ati: “Iyo urebye mu karere ka Kirehe, aho abagore bamaze kwisobanukirwa bakamenya ko icya mbere ari umurimo, iyo urebye abagore bakora umurimo w’ubuhinzi kurusha abagabo, nibo uzasanga bahinga bakanacuruza imboga, iyo urebye mu matsinda yo kugurizanya usanga abagore aribo benshi, iyo urebye abagore bacuruza uzasanga ari abagabo.”
Umuhuzabikorwa w’inama y’Igihugu y’abagore mu Karere ka Kirehe, Mukaneza Pelagie, yagize ati: “Iyo urebye abaturage bo mu Karere ka Kirehe, abenshi ni abagore kandi bakaba barisobanukiwe mu kuzana impinduka mu muryango kubera ubukangurambaga dukora nka CNF, bose bahagurutse bagakora twagera kuri byinshi kurushaho kandi ibyagezweho ni byiza, ubu turi gukomeza gushyiramo imbaraga kuko urangaye byasubira inyuma. Ubu turi gusigasira ibyagezweho kandi turasaba ubufatanye bwa buri wese kugira ngo tuzabigereho.”
Umuhuzabikorwa w’inama y’Igihugu y’abagore mu Ntara y’Iburasirazuba Mukamucyo Jeannette, yashimiye abagore bo mu Karere ka Kirehe ku bikorwa byinshi bagezeho, abasaba gushyira imbaraga mu kwegera abaturage ku rwego rw’umudugudu, kwimakaza isuku, kurwanya amakimbirane mu miryango; kandi buri wese agaharanira kuzuza inshingano ze neza.
Muri iyi nama hasinywe imihigo abagize inama y’Igihugu y’abagore mu karere ka Kirehe bazashyira mu bikorwa muri uyu mwaka wa 2025-2026, izibanda ahanini mu kurwanya ubukene, kurwanya imirire mibi, kwimakaza isuku n’isukura, kurwanya ihohoterwa rikorerwa abana ; no gukumira no kurwanya amakimbirane mu muryango.
Ku bufatanye n’abafatanyabikorwa batandukanye abagore kandi baremeye bamwe mu bana batsinze neza mu bizamini by’umwaka 2024-2025, ndetse hishyurira Mituweli imiryango 300 iyobowe n’abagore.
