Mu Mudugudu wa Matinza mu Kagari ka Nkondo, Umurenge wa Rwinkwavu bashyizeho uburyo bwihariye bwo kumenya amakuru y’Icyorezo cya COVID-19 mu mudugudu.
Ubwo hamurikwaga ibiro by’umudugudu wa Matinza abaturage biyubakiye, mu nteko y’abaturage yabaye kuri uyu wa Kabiri tariki 12 Ukwakira, aho yitabiriwe na komite nyobozi y’Akarere ka Kayonza ndetse n’inzego z’umutekano, mu bukangurambaga bwihariye bw’isuku n’umutekano hagamijwe kugira umudugudu uzira icyaha; abayobozi basuwe iki cyumba.
Icyumba ntangamakuru (Command Post) cy’umudugudu cyashyiriweho kurwanya Icyorezo cya COVID-19 cyatangiye mu kwezi kwa Kanama ndetse ngo bimaze gutanga umusaruro nk’uko bitangazwa n’umukuru w’Umudugudu wa Matinza Musabyimana Bernard,
Yagize ati: “Twitoyemo abantu 15 mu mudugudu bazenguruka umudugudu bakurikirana uburyo amabwiriza yo kwirinda COVID-19 ashyirwa mu bikorwa, abo bantu twabagabanyijemo ibice bitatu bagakora basimburanwa buri munsi, ku mugoroba turahura twese tugakusanya amakuru twabonye tukayandika.”
Mu biro by’Umudugudu wa Matinza harimo ishusho y’umudugudu n’amakuru yose aranga uyu mudugudu, niho hari amakuru yose ya COVID-19, kuva mu kwezi kwa Werurwe 2020 kugeza ubu muri uyu mudugudu harwaye abaturage babiri gusa.
Musabyimana Claudine ni umwe mu baturage bo mu mudugudu wa Matinza avuga ko basobanukiwe akamaro ko kwirinda icyorezo cya COVID-19,
Yakomeje agira ati: “Abantu 15 batowe nitwe twabitoreye, twishatsemo abantu b’inyangamugayo badufasha mu bukangurambaga bwo kwirinda icyorezo, aba bantu bigisha abaturage kwambara udupfukamunwa neza, guhana intera no kwirinda ko abantu bajya mu tubari Kandi tutemewe”
Umuyobozi w’Akarere ka Kayonza Murenzi Jean Claude yashimye abaturage bo muri uyu mudugudu intambwe bateye yo kumenya amakuru ku cyorezo cya COVID-19, yakomeje agira ati: “Iki cyumba gitangirwamo amakuru twagishimye Kandi turasaba ko kizakomeza gukora niyo iki cyorezo cyarangira, kizakomeze kibe icyumba ntangamakuru ku ngeri zose.”
Umudugudu wa Matinza ugizwe n’ingo 214, abaturage 1007, aba baturage nibo bafatanyije mu kwiyubakira ibiro by’umudugudu bifite agaciro ka miliyoni ebyiri z’amafaranga y’u Rwanda.
