Umurenge wa Murundi ni umwe mu mirenge irangwamo ubworozi bw’inka, ahari n’inzuri nyinshi zahariwe kororerwamo, aborozi bo muri uyu murenge bemeza ko biteguye kongera umukamo babikesha ibikorwaremezo bijyanye n’ubworozi bashyikirijwe.
Bimwe muri ibi bikorwaremezo byishimirwa n’abaturage harimo imihanda igera mu nzuri ndetse n’ibahuza n’indi mirenge, ikusanyirizo ry’amata rya Buhabwa, ingomero icyenda z’amazi zo kuhirira inka, amazi meza akomoka kuri izi ngomero aturuka ikuzimu, amashanyarazi n’amateme; ibi byose byegerejwe aborozi ba Murundi mu rwego rwo kubafasha kuvugurura ubworozi bwabo.
Mugarura Geoffrey ni umworozi wo mu Kagari ka Buhabwa mu mudugudu wa Mucucu, yemeza ko ibikorwaremezo bahawe nabo batangiye kubibyaza umusaruro bavugurura ubworozi bwabo,
Yakomeje agira ati: “Ibi bintu by’iterambere tugenda tubona twari tubibabaye cyane, ikintu cyajyaga kitugora ni ukubona amazi n’umuhanda, none umuhanda barimo barawukora, amazi turayafite.”
Shyaka Sam, Umworozi wo mu mudugudu wa Gakoma mu kagari ka Buhabwa, yagize ati “Mbere aha hari mu ishyamba, uko twabonaga amazi twategaga amazi y’imvura, mu rwuri rwawe wacukuragamo akantu k’akanogo hagati yaho imisozi ihurira, ayo niyo mazi twakoreshaga, mu gihe nta mvura ihari twashokaga ibishanga ahitwa ku cya Musenyeri.”
Nkunsi Abel ni umwe muri aba borozi na we yagize ati: “Ibyo turimo ubu ni ukongera umukamo, turahinga ubwatsi, icyari kitubangamiye ni uyu muhanda nawo twarawubonye amata agera ku ikusanyirizo nta kibazo. Ubu twongereye inka z’umukamo,muri macye nta kibazo dufite turiho turatera imbere turashima leta y’Ubumwe iyobowe na Nyakubahwa Perezida wa Repubulika kuko Mucucu twari mu bwigunge.”
Aba borozi bemeza ko ubu bishimiye ibikorwa bahawe, ko ntawukigisha mu ishyamba rya gisirikare rya Gabiro ndetse ubu n’iyo izuba ryacanye cyane inka zabo zitakicwa n’izuba kuko bahawe amazi.
Umuyobozi w’agateganyo w’Umurenge wa Murundi Gashayija Benon avuga ko ibikorwaremezo bahawe byaje gufasha aborozi benshi bari muri uyu murenge, yagize ati: “Kiriya ni igice gikunze kwibasirwa n’izuba, bahawe ibikorwaremezo bitahashobokaga ariko ubu byashobotse, nk’ubu muri iki gihe gishize cy’izuba ryacanye cyane nta kibazo cy’amazi twigeze tugira.”
Gitifu Gashayija yemeza ko mu bihe byashize iyo izuba ryacanaga bapfushaga inka nyinshi, ibintu ngo ubu bimaze kuba nk’amateka bitewe n’ibikorwaremezo bashyikirijwe.
Umurenge wa Murundi ufite inzuri 1,569 zororowemo inka 22,900. Mu kagari ka Buhabwa hamaze kubakwa ingomero z’amazi zizwi ku mazina y’amadamu icyenda, huzuye umuhanda Gakoma- Mucucu-Kageyo.
