Ubuyobozi bw’Akarere ka Kayonza buremeranya n’abahinzi b’umuceri ba Kayonza bibumbiye mu mpuzamakoperative y’abahinzi b’umuceri (Union Indatwa Kayonza) ko bagiye gushinga uruganda rutunganya umuceri, kandi rukazagirwamo uruhare n’abahinzi ubwabo.
Iyi myanzuro yafatiwe mu nama idasanzwe yahuje Umuyobozi w’Akarere ka Kayonza Nyemazi John Bosco ari kumwe n’inzego z’umutekano n’abahinzi, mu nama yabaye kuri uyu wa 04 Mutarama ibera muri Salle y’inama ya Koperative y’abahinzi b’umuceri Indatwa, yari igamije kurebera hamwe uko bashinga uruganda rw’abahinzi b’umuceri rwihariye rw’Abanyakayonza kandi rufite ikirango (Brand) cya Kayonza.
Bareberaga hamwe kandi uko bakongera umusaruro w’umuceri, gukoresha ikoranabuhanga mu guhinga umuceri, kwitabira gahunda za leta zashyizwe mu mishinga migari ifasha abahinzi n’aborozi mu kwagura imirimo yabo bunganiwe na leta.
Ubuyobozi bwakoranye inama na bamwe mu bahinzi b’umuceri n’abayobozi babo bari muri Koperative Indatwa ifite abanyamuryango basaga 4,600 bahinga mu gishanga cya Rwinkwavu gikora mu mirenge ya Rwinkwavu, Mwili na Gahini; Koperative Duterimbere Murundi bahinga muri Murundi; hari kandi abahinga muri Kabare, Ruramira na Mukarange; abahinzi b’umuceri muri ibyo bice bose hamwe bakaba barenga 6,800.
Muri iyi nama niho bemereje ko hakwiye kubaho uruganda rw’umuceri, hakongera gukorwa inyigo neza kugira ngo uru ruganda rutangire gukora.
Gasasira Thomas ni Umuyobozi wa Koperative Duterimbere Murundi avuga ko nk’abahinzi b’umuceri babanje kwicara biga uko bazagira uruganda rwabo rukagira icyicaro i Rwinkwavu kuko ariho hari koperative Indatwa kandi ifite abahinzi b’umuceri benshi banabona umusaruro mwinshi.
Yakomeje agira ati: “Hashize igihe twarateguye inyigo y’umushinga ifite agaciro ka miliyoni zisaga 900 z’amafaranga y’u Rwand, aha harimo amafaranga y’ibikoresho by’uruganda ndetse n’igishoro cyo kuzagura umusaruro w’abahinzi; kugeza ubu turacyategereje ko ubuyobozi bw’Akarere bubiha umugisha.”
Mbere y’uko hakorwa iyi nyigo, basanga bagabanyije ku buryo bungana buri munyamuryango yari gutanga ibihumbi 36 by’amafaranga y’u Rwanda.
Abahinzi bafashijwe n’Akarere gukora ingendoshuri ku bandi bahinzi bakoze inganda z’imiceri ziri mu majyepfo.
Umwe mu bagiye muri uru rugendo ni Bavukayo Thomas yagize ati: “Twishimiye ko ubuyobozi bubihaye umurongo ko uruganda ruzagirwamo imbaraga n’abahinzi n’ibizavamo, inyungu zikazagaruka ari iz’abahinzi, ahandi twasuye twasanze bo bakora neza kandi umuhinzi ntahendwa no kugura umuceri ahinga, kuko awugura ku giciro kitamugoye.”
Iragena Jean Pierre na we ni umuhinzi w’umuceri wishimiye ko bagiye kubona uruganda kandi bigiriyemo uruhare, ati: “Akarere katwitayeho cyane kandi gashyigikiye ko igitekerezo twagize mbere cyashyirwa mu bikorwa tukagira uruganda rwacu ruzajya rutunganya umusaruro wacu.”
Umuyobozi w’Akarere ka Kayonza Nyemazi John Bosco yemeza ko nyuma y’ibi biganiro basanze bishoboka ko uruganda rwashingwa nyuma yo kugenzura buri kintu cyose ndetse hakagenwa uburyo bwo kuzarukurikirana, yakomeje agira ati: “Tugiye kurebera hamwe uko twakora uruganda rwiza, twafatanya n’inzego zitandukanye bakadukorera inyigo nyayo igendeye ku ruganda rwiza rushoboka.”
Meya Nyemazi akomeza avuga ko hari imishinga migari ya Leta nka SPIU izegerezwa aba bahinzi kugira ngo ibaganirize ku mahirwe ahari yo kubyaza umusaruro, aha kandi bazasaba ko Minisiteri y’ubucuruzi n’inganda nayo izabafasha kubereka umurongo muzima bakoreramo ubaganisha ku nyungu ndetse n’izindi nzego zishoboka zose zabafasha kubagira inama zizahura n’aba bahinzi kugira ngo barusheho kunononsora umushinga wabo.
Muri rusange ibi bishanga byose byatunganyijwe bihingwamo umuceri bifite ubuso bwa hegitari 1,272, ku gihembwe kimwe cy’ihinga habonekaho umusaruro ugera kuri toni toni zisaga 5,720.
