Abafite ubumuga bo mu karere ka Kayonza bemeza ko umuco w’isuku n’isukura ukiri ikibazo gikomeye by’umwihariko ku bantu bafite ubumuga kuko ibyinshi mu bikoresho byifashishwa mu rugo mu isuku bitazirikana uburenganzira bwabo.
Mu birori byo gukomeza kuzirikana umunsi mpuzamahanga wo kwita ku bantu bafite ubumuga byabaye kuri uyu wa 07 Ukuboza mu murenge wa Kabarondo, hatanzwe ibikoresho byifashishwa mu isuku n’isukura by’umwihariko byagenewe abafite ubumuga batandukanye.
Nubwo ibi bikoresho byatanzwe abafite ubumuga bemeza ko bakibangamiwe cyane n’uko nabo bagira uruhare mu bikorwa by’isuku n’isukura. Gatete Vincent ni umwe mu bafite ubumuga wo mu murenge wa Kabarondo yemeza ko bitoroheye ufite ubumuga gukora isuku cyangwa kuyikorerwa neza 100% nk’uko bikwiye kuba bigenda nta nzitizi n’imwe ibonetse.
Yakomeje agira ati: “Isuku niyo soko y’ubuzima, ikibazo kiba mu kugira isuku mu cyaro ku bafite ubumuga bisaba ubushobozi byagera kuri ya miryango itishoboye bikaba ikibazo gikomeye.”
Gakuru Theophile ni Imboni y’isuku n’isukura mu murenge wa Kabarondo, yanatorewe na bagenzi be kuba umuhuzabikorwa w’inama y’igihugu y’abafite ubumuga mu murenge,
Kuri iki kibazo cy’isuku n’isukura by’umwihariko ku bafite ubumuga yagize ati: “Mu bijyanye n’isuku n’isukura abafite ubumuga baracyafite imbogamizi zikomeye cyane, ntabwo bari babona uburyo buboroheye bwo kwisukura, nko mu ngo zacu hari ubwo tuba dukeneye ibikoresho bidufasha twicaraho haba mu kwiyuhagira cyangwa turi mu bwiherero.”
Gakuru akomeza avuga ko ikindi kibazo kibangamira abafite ubumuga mu isuku ari uko hari abakorerwa isuku n’abandi kuko nta bushobozi bafite nyamara bakwiye kuyikorera ubwabo, aha niho yakomeje agira ati: “Hari umushinga witwa ‘Isoko y’Ubuzima’ nanjye najyanyemo umushinga wanjye w’ubuvugizi ku bantu bafite ubumuga nabo babona ibikoresho by’Isuku n’Isukura.”
Ibi bikorwa, Akarere ka Kayonza kabigezeho ku bufatanye n’abafatanyabikorwa bako bari muri gahunda yo gufasha abafite ubumuga ndetse n’abita ku isuku n’isukura nka ‘Water for People Rwanda’ mu mushinga wawo witwa Isoko y’Ubuzima uterwa inkunga na USAID.
Umwe mu bayobozi b’uyu mushinga ni Kurt S Henne, ashinzwe ibikorwa mu umushinga isoko y’ubuzima yemeza ko ibikorwa by’isuku n’isukura bazakomeza kubifatanyamo n’abaturage n’ubuyobozi mu kwigisha abaturage uko bagira isuku, abaturage bigishwa kwishyira hamwe mu matsinda abafasha gutera imbere bakigiramo byinshi bitandukanye byabafasha kwiteza imbere.
Umuyobozi w’Akarere wungirije ushinzwe imibereho myiza y’abaturage mu karere ka Kayonza Harelimana Jean Damascene yemeza ko ikibazo cy’isuku n’isukura gikwiye guhabwa imbaraga kurushaho,
Yagize ati: “Abahanga batubwira ko indwara nyinshi dukunze kugira ziterwa n’umwanda, umwanda tubashije kuwirinda twaba dukumiriye indwara nyinshi, tugaruke ku gukaraba intoki bitaraba umuco, ese twese mu ngo zacu aho dutuye tworohereza ufite ubumuga?”
Visimeya Harelimana yakomeje asaba abaturage kwita ku bafite ubumuga no guharanira uburenganzira bwabo, yakomeje agira ati: “Twese aho dukorera dukwiye kuba dufite uburyo bworohereza abafite ubumuga, ntahezwe mu kubona serivisi.”
Ibikoresho byatanzwe mu gokora isuku n’isukura ni 12 bishobora gukoreshwa gusukura abantu 12 kugeza kuri 16 hifashishijwe ibikombe bibiri by’amazi.
