Ishuri Rikuru ryigisha Ubuhinzi n’Ubworozi bubungabunga Ubutaka (Rwanda Institute for Conservation Agriculture – RICA) riherereye mu Karere ka Bugesera, ku nshuro yaryo ya kane ryatanze Impamyabumenyi ku banyeshuri 82 basoje amasomo bize mu gihe cy’imyaka itatu, bakaba barangije Icyiciro cya Kabiri cya Kaminuza mu bijyanye n’ubuhinzi burengera ibidukikije.
Ibirori byo gushyikiriza izi mpamyamumenyi aba banyeshuri, byabereye mu Karere ka Bugesera kuri uyu wa Gatanu tariki 18 Nzeri 2026, byitabirwa n’abayobozi batandukanye, ababyeyi b’aba banyeshuri ndetse n’abafatanyabikorwa.
Umuyobozi Mukuru w’Inama Nkuru y’Amashuri Makuru na Kaminuza (HEC), Dr. Edward Kadozi yasabye abarangije muri RICA kuba abashakashatsi bazana ibisubizo mu baturage kandi bagakoresha ikoranabuhanga mu buryo bwiza hagamijwe guteza imbere ubushakashatsi buhuza uburezi n’ibikenewe n’abaturage ndetse n’inganda.
Ati: “RICA yerekana uko ibi bishobora gukorwa, yibanda ku buhinzi n’ubworozi bubungabunga ibidukikije, ikagaruka ku bibazo by’ingutu bikomereye u Rwanda n’Afurika, nko kumenya uko twakongera umusaruro binyuze mu bushakashatsi.”
Yakomeje agira ati: “Ejo, aba barangije bazongera babibe izindi mbuto binyuze mu mirimo yabo, ibitekerezo, ubushakashatsi, ubucuruzi, n’imiyoborere ishingiye ku gufasha umuryango. Uku ni ko uburezi buhindura ubuzima, ni ko ibigo bihinduka moteri y’iterambere, kandi ni ko ubumenyi bushakirwa hano muri RICA bushobora gufasha ejo hazaza h’ubuhinzi bw’u Rwanda na Afurika muri rusange.”
Niyompano Benitus usoje amasomo muri RICA, yagize ati: “Benshi muri twe, ubuhinzi bwari inzira nshya yo kunyuramo, ariko kuri uwo munsi dutangira kwiga, twasangiye urugendo hano muri RICA dusanga ari ikigo gifite inshingano zagutse zo gufasha no kwereka inzira icyiciro gishya cy’abanyeshuri bagomba kuba abantu bazahanga udushya mu guhindura ubuhinzi.”
Umuyobozi Wungirije w’Agateganyo mu Ishuri Rikuru rya RICA, Dr. Olusegun Yerokun, yagaragaje ko ubumenyi bw’abarangije muri iyi Kaminuza budashidikanywaho ku isoko ry’umurimo no gukemura ibibazo bikiri mu kugera ku buhinzi bubungabunga ibidukikije.
Yagize ati: “Uyu munsi ntitwizihije impapuro gusa, ahubwo twizihije ubumenyi, ubuhanga mu kazi no kwitanga abana bagize mu myaka itatu yose biga mu mashuri muri za raboratwari ndetse no mu mirima, aho bigishyijwe gushaka ibisubizo by’ibibazo biboneka mu buhinzi bwacu kugira ngo bafashe abahinzi bato kandi barengere ubutaka n’ibidukikije.”
Abanyeshuri 82 barangije amasomo yabo mu buhinzi burengera ibidukikije bigatuma abamaze kurangiza amasomo muri iyi kamenuza bose hamwe bagera 321 mu myaka ine.
