Ikipe y’ingabo zo muri Tanzania muri Brigade ya 202 yatwaye igikombe cy’umukino wa gishuti wayihuje n’ikipe ya Division ya 5 ya RDF kuri Penaliti 5-4, hashimwa umubano w’ibihugu byombi mu gukomeza guteza imbere imikoranire myiza yageze no mu basirikare b’ibi bihugu.
Ni umukino wabaye kuri uyu wa Gatandatu, tariki 25 Ugushyingo 2023, kuri Sitade y’Akarere ka Ngoma mu rwego rwo gukomeza guteza imbere no kubaka ubumwe, imikoranire myiza ndetse n’icyizere.
Ikipe y’ingabo zo muri Tanzania muri Brigade ya 202 (Tanzania People’s Defence Force(TPDF) yabanje gukorana umuganda wo gukora ikibuga cy’umupira cyangiritse hamwe n’ubuyobozi bw’Akarere ka Ngoma ku kibuga cy’umupira cya GS Kabare giherereye mu mudugudu wa Kabuye, Akagari ka Nyamagana mu Murenge wa Remera.
Imvura nyinshi yagwaga muri aka Karere nyuma y’uko imaze guhita, igice cya mbere cy’umukino wahuje Ikipe y’ingabo zo muri Tanzania muri Brigade ya 202 n’ikipe ya division ya 5 ya RDF cyahise gitangira saa cyenda n’igice zirenga z’umugoroba ku mpande zombi ubona ko bashaka gutsinda ariko ibitego bikanga bikabura.
RDF yari yambaye imyenda y’imikara irimo umweru muke yatangiye kubura umupira wahererekanwaga n’abahungu bo mu ikipe y’ingabo za Tanzania bari bambaye icyatsi kirimo umweru muke neza.
Ku munota wa 22′ umukinnyi wa Tanzania wambaye 19 yahawe ikarita y’umuhondo nyuma yo gukinira nabi umwe mu bataka ba RDF wari ugiye gutsinda igitego anyuze mu ruhande rw’iburyo.
Umukino wakomeje kuryohera abari baje kwihera ijisho aba basirikare, dore ko bari bishimye nubwo abakinnyi bo bagorwaga nuko ikibuga cy’umupira cyanyereraga kubera imvura yaguye.
Ikipe y’ingabo za Tanzania yakomeje gushimisha abantu gusa igahusha ibitego byabazwe; ibintu umutoza wa RDF yabonaga bigatuma asimbuza cyane muri uyu mukino waje kurangira igice cya mbere ikipe zombi zinganya 0-0.
Igice cya Kabiri cyatangiye amakipe ubona azanye impinduka gusa nyuma y’iminota itatu gusa ikipe ya RDF yahise isimbuza abasore babiri bakomeza gushaka intsinzi gusa bikanga ikabura, ku munota wa 50 abakinnyi batatu b’ingabo za Tanzania bahushije igitego kubera amazi(bashotaga bikanga).
Ikipe y’ingabo zo muri Tanzania muri Brigade ya 202 yakomeje gukina neza ku munota wa 59′ batsinze igitego baha ibyishimo abari bayishyigikiye nubwo bitatinze kuko ku munota wa 62′ w’umukino ikipe ya RDF yashyuye biba 1-1.
Ni bintu byahaye RDF imbaraga zo gushaka gutahana intsinzi mu mukino wari watangiye kuzamo ibihu byinshi gusa ku bw’amahirwe make bahushaga ibitego byinshi byatumye bongera gusimbuza havamo na kapiteni ku munota wa 83′.
Impinduka bakoze zatumye ku munota wa 85′ ingabo za RDF zitsinda igitego cya kabiri bya bihu bihita bigenda abafana batangira kwishima, mu gihe bakishima byakanguye ikipe y’abaturanyi bituma ku munota wa 87′ bahita bishyura biba 2-2 abafana bahita baceceka.
Mu minota itanu y’inyongera umutoza wa Ikipe ya RDF yakoze impinduka maze ashyiramo umuzamu mushya n’undi mukinnyi wambaye numero 5, gusa ntacyo byatanze kuko umukino warangiye amakipe yombi anganya 2-2 nyuma yuko ibihu byakomeje kwiyongera ku buryo abafana batareba neza umukino.
Nyuma aya makipe yahanganye akereka abakunzi bayo umukino mwiza bitabaje amapenaliti nubwo ibihu byabangamiye umufana kuzireba, birangira Ikipe y’ingabo zo muri Tanzania muri Brigade ya 202 itsinzi ikipe ya division ya 5 ya RDF penaliti 5-4 maze baba batahanye igikombe gutyo.
Nyuma y’umukino division ya 5 ya RDF yashimiwe maze ikipe y’abaturanyi bo mu gihugu cya Tanzania bahabwa igikombe bishimiye cyane.
Uyu mukino witabiriwe n’abayobozi batandukanye barimo, Umuyobozi wa Division task force, Brig gen Frank Mutembe, Umuyobozi w’ingabo muri Division ya 5, Colonel Justus Majyambere, Abayobozi batandukanye bo muri RDF, Umunyamabanga nshingwabikorwa w’Intara y’Iburasirazuba, Dr. Nyirahabimana Jeanne, Abayobozi b’utundi uturere twa Kayonza na Kirehe, Komite Nyobozi y’Akarere ka Ngoma n’abandi batandukanye.
Umuyobozi w’ingabo muri Division ya 5, Colonel Justus Majyambere, yavuze ko uyu mukino ugamije gukomeza guteza imbere kubaka ubumwe, kubaka imikoranire myiza n’ikizere hagati ya RDF na TPDF
Yagize ati: “Division ya 5 ishinzwe umutekano mu turere twinshi tw’Intara y’Iburasirazuba tukaba duhana imbibi n’iyi Brigade ya 202 y’abasirikare ba Tanzania nayo ikaba ishinzwe umutekano mu Ntara zirindwi harimo ‘Mko wa Kagera A’ ariwo duhana imbibi, ibi ntabwo bitangiye uyu munsi kuko hagiye habaho inama zitandukanye zirebera hamwe umutekano muri rusange, ibyaha byambukirana umupaka.”
“Twahuye kenshi n’abo ariko dusanga mu gukomeza guteza imbere imikoranire myiza, umubano mwiza tukwiye kubimanura bikajya no mu basirikare mu buryo bwo kubaka icyizere mu basirikare b’impande zombi arinabo twatekereje kuzakina uyu umukino wa gicuti.”
Col. Justus Majyambere yavuze ko hazaba undi mukino wo kwishyura mu mwaka wa 2024, ukazabera muri Tanzania.
Yagize ati: “Ni byo koko uko twabiteganyije uyu niwo mukino wari uwa mbere wakiriwe na division ya 5 ya RDF yawakiriye hakaba hari undi mukino wa gishuti uzabaho ukabera muri Tanzania nubwo tutaremeza igihe ariko ni umwaka utaha nko mu ntangiriro za Nyakanga, ntabwo turemeza igihe ushobora kuzabera muri Tabora cyangwa se hano hafi mu Mkoa w’Akagera.”
Umujyanama mu bya Gisirikare mu Ambasade ya Tanzania mu Rwanda, Col. Ramadhan Athuman Dogol yavuze ko umubano mwiza w’u Rwanda na Tanzania mu bya gisirikare uhera ku buyobozi bukuru bwashyizeho ubufatanye no gushakira ubusugire abaturage ndetse n’imikoranire myiza y’ibya gisirikare.
Yagize ati: “Dufitanye umubano mwiza n’u Rwanda ndetse n’amateka kuko duhuriye mu muryango w’Afurika y’Iburasirazuba, duhana ubumenyi mu bya gisirikare kuko turafatanya cyane aho abanyeshuri b’abasirikare ku mpande zombi biga mu bihugu byacu, icyongeyeho dufite abaturage ba Tanzania baba mu Rwanda kandi tubanye nk’abavandimwe.”
Nyuma y’umukino habahe igikorwa cy’ubusabane hagati y’ibihugu byombi ndetse baranatarama. 
