Mu Karere ka Kirehe, umubare w’ingo zifite amashanyarazi wazamutse uva ku 48,194 mu 2021 ugera ku 72,050 mu 2026, bivuze ko mu myaka itanu hiyongereyeho ingo 23,878, mu mibare iherutse kugarukwaho ubwo inama Njyanama y’aka karere yasozaga manda yayo y’imyaka itanu(2021-2026) igaragaza ibyagezweho.
Amashanyarazi ni imwe mu nkingi za mwamba zituma iterambere ry’Igihugu ryihuta kuko ni yo inganda zifashisha mu gutunganya ibyo muntu adasiba gukenera mu buzima bwa buri munsi.
Perezida w’Inama Njyanama y’Akarere ka Kirehe, Prof. Dr.Kabera Callixte, yavuze ko mu bikorwa by’ingenzi byagezweho muri manda ya 2021–2026 harimo kongera amashanyarazi agera ku baturage.
Yagaragaje ko mu 2021 ingo zifite amashanyarazi zari 48,194, ariko zikaba zarageze kuri 72,050 mu 2026. Ibi byatumye igipimo cy’ingo zifite amashanyarazi, harimo n’izikoresha imirasire y’izuba, kizamuka kivuye kuri 72.3% kigera kuri 89.6%.
Prof. Dr.Kabera yavuze ko iri terambere ari intambwe ikomeye ugereranyije n’aho Kirehe yari iri mu myaka yashize, ati: “Mu 2010 aka Karere nta shanyarazi na rimwe ryabagamo, ariko duhereye muri 2021 muri iyi manda umubare w’ingo zifite amashanyarazi wariyongereye, uyu munsi dufite ingo 72,050.”
Akarere ka Kirehe gafite abaturage 460,860 batuye mu ngo 110,659. Muri izo ngo, 99,261 zingana na 89.7% zimaze kugerwaho n’amashanyarazi, aho 73,940 zikoresha amashanyarazi afatiye ku muyoboro mugari (on-grid), mu gihe 25,321 zikoresha amashanyarazi akomoka ku mirasire y’izuba (off-grid).
Kuri ubu mu Rwanda amashanyarazi amaze gukwirakwizwa ku kigero cya 88%, aho 12% gasigaye na ko kazaba kagezweho n’amashanyarazi muri 2029 nk’uko biri mu ntego za Guverinoma.
Muri Gahunda ya 2 y’Igihugu yo Kwihutisha Iterambere-NST2 (2024-2029), Guverinoma yiyemeje kugeza amashanyarazi mu tugari twose (2,148) mu 2029, bivuye ku tugari 1955 (91%) mu 2024.
