Mu turere twa Kirehe, Rwamagana, Ngoma na Bugesera, two mu Ntara y’Iburasirazuba hatangijwe umushinga wo kubungabunga ibidukikije, wa miliyoni 180Frw, uzamara umwaka.
Ubu buryo bwo kubungabunga ibidukikije buzakoreshwa burimo ingufu za ‘Biogaz’ n’imbabura za kijyambere zikoresha amakara macye.
Ni umushinga watangirijwe ku mugaragaro mu Karere ka Ngoma kuri uyu wa Kane, tariki 26 Ugushyingo 2020, w’ikigo cy’igihugu gishinzwe kubungabunga ibidukikije –Fonerwa.
Uzamara umwaka ushyirwa mu bikorwa n’Umuryango Inades Formation Rwanda, uharanira iterambere ry’ubukungu n’imibereho myiza. Ukazarangira utwaye amafaranga y’ u Rwanda asaga miliyoni 180.
Karangwa Innocent, Umuyobozi Nshingwabikorwa wa Inades Rwanda, arasobanura ko bazubakira abaturage bo mu turere twa Ngoma, Kirehe, Rwamagana na Bugesera uburyo bwo kurondereza ibicanwa.
Yagize ati: ”Utu turere tw’Iburasirazuba dufite ibiti bike, rero ni ukugira ngo n’izo nkwi abaturage bakoresha zibe nke. Ariko n’ahari ibiti byinshi turakangurira abantu kutabikoresha, kuko bifite akamaro kanini cyane mu kubungabunga ibidukikije, ahubwo dukwiye no kongera ibiti n’amashyamba.”
Yongeyeho ati: ”Dufite n’imbabura za Cana make, rwose turashaka ko dukoresha amakara make, ibiti bitemwa bibe bike cyane.”
Havugarurema Jean Marie Vianney, Umukozi ushinzwe gucunga imari n’imishinga igamije kurengera ibidukikije mu kigo k’igihugu gishinzwe kubungabunga ibidukikije -Fonerwa,
Yagize ati:”Yaba amashyiga na Biyogazi, bizahabwe abaturage bafite ubushake n’umuhate wo kubifata neza kugira ngo ibi bikoresho bizabafashe mu gihe kirekire.”
Mapambano Nyiridandi Cyriaque, Umuyobozi wungirije w’Akarere ka Ngoma ushinzwe ubukungu n’iterambere avuga ko uyu mushinga uzafasha abaturage no mu iterambere kuko umwanya bakoreshaga bajya gushaka inkwi uzagabanyuka.
Ati: “Ni umushinga twizeye ko uje kurushaho kudufasha kubungabunga ibidukikije, abaturage bagorwaga no kubona inkwi ubu noneho binyuze muri uyu mushinga bakaba bazajya babasha gucana inkwi nke, abandi bakazubakirwa Biyogazi, bagateka kuri biyogazi. Bizafasha mu gukoresha neza umwanya watakaraga abantu bagiye gushaka inkwi, ariko bizanadufasha mu kubungabunga no kwita ku bidukikije.”
Uturere tune two mu Ntara y’Iburasirazuba tuzakorerwamo uyu mushinga tuzubakwamo ‘Biogaz’ 110, hanatangwe imbabura za kijyambere 1,484.
