Abayobozi batorewe kuyobora imidugudu mu Murenge wa Kabarore w’Akarere ka Gatsibo bagaragaje ko kongera ibikorwaremezo no guteza imbere imibereho myiza y’abaturage biri mu byo bashyize imbere, bagaragaza ko bazabigeraho ku bufatanye n’abaturage ndetse n’ubuyobozi bubakuriye.
Munyambibi Emmanuel, watorewe kuyobora Umudugudu wa Kabarore ya mbere, mu Kagari ka Kabarore mu Murenge wa Kabarore, avuga ko bazafatanya n’abaturage kubaka ibikorwaremezo birimo imihanda y’imigenderano, ndetse bagakorana n’ubuyobozi bubakuriye mu bikorwa birenze ubushobozi bwabo.
Yagize ati: “Tuzafatanya n’abaturage kubaka ibikorwaremezo birimo imihanda y’imigenderano, ibyo tudafitiye ubushobozi dukorane n’Ubuyobozi budukuriye, ikindi ni ugusaba abayobozi natwe tugatanga umusanzu wacu tukaziyubakira isoko ryacu rya Kabarore, mfite icyizere ko hamwe n’abaturage nyoboye tuzabigeraho.”
Mutoni Chantal, watorewe kuyobora Umudugudu wa Kabingo, avuga ko bazibanda ku kwiyubaka mu bushobozi, gukumira no kurwanya amakimbirane mu miryango, ndetse no guharanira ko abana bose bajya ku ishuri.
Yagize ati: “Tuzafatanya n’abaturage kwiyubaka mu bushobozi, gukumira no kurwanya amakimbirane mu miryango, tuzirikana uburere bw’abana, duharanira ko abana bose bajya ku ishuri.”
Bamwe mu baturage bitabiriye amatora, baganiriye na MUHAZIYACU bagaragaza ko kwihitiramo abayobozi ari amahirwe yo kugira uruhare mu iterambere ryabo, bakaba biteguye gushyigikira abo batoye kugira ngo babashe gushyira mu bikorwa ibyo biyemeje.
Musoni John, utuye mu Mudugudu wa Kabarore ya mbere, mu Kagari ka Kabarore, mu Murenge wa Kabarore, avuga ko bishimiye kugira uruhare mu guhitamo abayobozi, kandi ko biteguye kubashyigikira kugira ngo ibyo biyemeje bazabigereho.
Yagize ati: “Twishimiye ko tugira uruhare rwo kwihitaramo abatuyobora bizatuma tubashyigikira kugira ngo ibyo biyemeje tubatora bazashobore kubishyira mu bikorwa.”
Muri ibi bihe by’amatora y’inzego z’imitegekerere y’Igihugu zegerejwe abaturage yatangiye tariki 24 Ukwakira, akazakomeza gukeza mu mpera z’Ugushuyingo 2026, abaturage bagize inteko itora bashishikarizwa gutora abayobozi bafite indangagaciro kandi bagendana n’icyerekezo cy’Igihugu, kigamije gushyira umuturage ku isonga.
