Inzego z’ibanze zifatanyije n’abaturage bo mu Murenge wa Munyaga mu Karere ka Rwamagana bari gushakisha umurambo w’umusore witwa Mbarushimana Theogene w’imyaka 19 warohamye mu kiyaga cya Mugesera ubwo yajyanagayo na bagenzi be.
Ibi byamenyekanye ku mugoroba wo kuri uyu wa gatandatu ubwo abasore batanu n’abakobwa bane bagiye kugorobereza mu rufunzo, aho bavuga ko baganiraga nk’inshuti.
Umunyamabanga Nshingwabikorwa w’Umurenge wa Munyaga, Mukashyaka Chantal yemereye MUHAZIYACU ko umurambo w’uyu musore ugishakishwa nyuma y’aho agiye koga muri Mugesera akaburirwa irengero.
Yagize ati “ Nibyo koko hari umusore w’imyaka 19 waraye aguye mu mazi nijoro, umurambo we uracyashakishwa ntabwo uraboneka, yaguyemo nijoro mu ma saa moya. Bari abasore batanu n’abakobwa bane bakora urugomo rwo kujya kugorobereza mu rufunzo ruhari ngo baganiraga nk’inshuti, hanyuma batindayo, turakeka ko banagiye mu bikorwa by’ubusambanyi, ntabwo babyemera ariko urebye nibyo bari bagamije.’
Gitifu akomeza avuga ko nk’uko abo basore n’inkumi babyivugira ngo byageze mu ma saa moya z’ijoro uwo musore akinjira iy’amazi kugira ngo yoge, bikarangira bamubuze. Ngo uwo musore akimara kubura abo bari kumwe bazamutse baratabaza, abaturage baza kumushakisha burinda bucya batarabona umurambo we.
Yasabye abaturage baturiye amazi kwirinda kuyakinisha ndetse n’ababyeyi bakarushaho kwita ku kumenya aho abana babo bari cyane cyane muri ibi bihe byo kwirinda icyorezo cya Koronavirusi.
Bivugwa ko aba basore bagiye mu rufunzo ku manywa byagera nijoro bagatinya kuvayo kugira ngo badahura n’inzego z’umutekano zikabafata ahubwo ngo barindira amasaha y’ijoro cyane kugira ngo aribwo bataha.
Kuri ubu abari kumwe n’uyu musore nibo bari gufasha ubuyobozi n’abaturage gushakisha aho yaba yarengeye.
Ibitekerezo 1