Ubuyobozi bw’Akarere ka Gatsibo burakangurira urubyiruko ruri mu biruhuko kutishora mu ngeso mbi, bakitabira gahunda y’Intore mu biruhuko kuko bahagira indangagaciro zikwiriye Umunyarwanda nyawe uzigirira akamaro akakagirira n’Igihugu.
Byagarutsweho kuri uyu wa 24 Nyakanga 2026 mu gikorwa cyo gitangiza gahunda yo kwita ku rubyiruko mu biruhuko, ni gahunda ifite insangamatsiko igira iti:” Imyitwarire myiza, ubuzima bwiza” ku rwego rw’Akarere ka Gatsibo, iki gikorwa cyatangirijwe mu Kagari ka Butiruka mu Murenge wa Remera, rugomba kwitabira gahunda y’Intore mu biruhuko rugera ku bihumbi 48 ruva mu mirenge 14 igize akarere.
Umuyobozi w’Akarere ka Gatsibo wungirije ushinzwe imibereho myiza y’abaturage Mukamana Marceline yasabye ababyeyi kurekura urubyiruko rukitabira gahunda y’Intore mu biruhuko kuko bahungukira ubumenyi bubafasha kubaka ejo hazaza heza.
Aragira ati:” Iyi gahunda icyo ivuze ku bana n’urubyiruko, ni uko muri iyi gahunda y’Intore mu biruhuko, urubyiruko ruhigira amateka y’Igihugu cyacu, bagakora imikorongiro, bakagira umwanya wo gukina no kwidagadura byose bigamije ku bagira urubyiruko rukwiriye, rufite indangagaciro zibereye Umunyarwanda nyawe, turakangurira ababyeyi kurekura abana bakitabira iyi gahunda, kuko dufite abatoza twateguye n’ubundi biganjemo abarezi babo bari mu biruhuko, rero bari mu biganza byiza, babareke baze bazahungukira byinshi bizabafasha mu myigire yabo no mu buzima busanzwe.”
Bamwe mu rubyiruko ruri mu biruhuko baganiriye na MUHAZIYACU bavuga ko bagenzi babo batitabira gahunda y’Intore mu biruhuko bahombo byinshi, kuko muri iyi gahunda bahigira amateka yaranze Igihugu, bakanigishwa uko bashobora kwiteza imbere.
Uwiringiyimana Léa wo mu Kagari ka Nyagakombe mu Murenge wa Remera, yagize ati:” Ibikorwa by’Intore mu biruhuko bidufasha kuko tuhigira amateka yaranze Igihugu cyacu, tukabona umwanya wo gusabana na bagenzi bacu, tukidagadura bigatuma urubyiruko rutishora mu ngeso mbi z’ubusambanyi no kunywa ibiyobyabwenge.”
Shumbusho Eric ni uwo mu Murenge wa Kiramuruzi, na we ati:” Muri gahunda y’Intore mu biruhuko tuhigira kubaka ubuzima bufite intego n’ikerekezo kizima, iyo turi muri iyi gahunda twiga umuco,kwiyubaha no kubaha abandi haba abo tungana n’abaturuta, tukiga amateka y’Igihugu cyacu, bigatuma dushobora gutegura ahazaza heza hacu nk’urubyiriko.”
Gahunda y’Intore mu biruhuko, izajya ikorwa mu byiciro bitatu, icyiciro cyambere ni abari hagati y’imyaka 10 kugeza kuri 13, icyiciro cya kabiri ni abari hagati y’imyaka 14 kugeza kuri 17, naho icyiciro cya Gatatu ni ukuva ku myaka 17 kugeza kuri 20. Bikazajya bahura mu minsi itatu mu cyumweru, aho urubyiruko ruzajya rwigishwa rukanatozwa indangagaciro z’umuco Nyarwanda, n’abafite impano bakazigaragaza biciye mu mikino n’imyidagaduro.
Biteganijwe ko gahunda y’Intore mu biruhuko yatangiye kuri uyu wa 24 Nyakanga, izasozwa ku wa 28 Kanama 2026.
