Ku bufatanye bw’urwego rw’Igihugu rw’Uubugenzacyaha(RIB) n’Akarere ka Gatsibo mu murenge wa Muhura hatangirijwe ubukangurambaga bwo kwigisha abaturage kugira uruhare mu gukumira ibyaha bihungabanya ibidukikije n’ibindi byaha by’inzaduka.
Mu rwego rwo gufasha abaturage kwirinda ibyaha, abakozi ba RIB bari kumwe n’ubuyobozi bw’Akarere ka Gatsibo basobanuriye abaturage ibijyanye n’itegeko rivuguruye ryo kurengera ibidukikije. Aha mu Murenge wa Muhura ni hamwe mu hakorerwa ubucukuzi bw’amabuye y’agaciro yo mu bwoko bwa gasegereti .
Umuyobozi wa RIB mu Ntara y’Iburasirazuba Rutaro Hubert, yasabye abanyamuhura kwirinda kujya mu bucukuzi bw’amabuye y’agaciro butemewe kuko muri Muhura ari kamwe mu duce dukungahaye ku bucukuzi bw’amabuye y’agaciro, tukabonekamo n’abantu bishora muri ubu bucukuzi bw’amabuye y’agaciro butemewe.
Yakomeje agira ati: “Kuvuga Muhura ubusanzwe uba uvuze ikawa n’amabuye y’agaciro, uba uvuze amafaranga, ariko kuvuga Muhura n’ubucukuzi bw’amabuye y’agaciro butemewe ntabwo ari byo, sibyo bikwiye kuranga Umurenge wa Muhura, usibye kuvuga ko gukora ubucukuzi butemewe byangiza ibidukikije, murabizi ko bitwara ubuzima bw’abantu, hari abantu bishora mu bucukuzi bw’ahantu hatapimwe ngo hamenyekane ubukomere bw’ubutaka.”
Ubuyobozi bw’Akarere ka Gatsibo buvuga ko abacukura mu buryo butewe bangije umwe mu miyoboro y’amazi wubatswe utwaye amafaranga y’u Rwanda milayiri imwe na miliyoni 800, uyu muyoboro wangijwe watumye abaturage babura amazi, witwa Rwandabarasa (Gasange, Muhura Remera);
Byatumye hari abaturage batabasha kubona amazi, barimo abo mu tugari tubiri two mu murenge wa Gasange ari two Viro na Kigabiro, akagari ka Taba n’igice cy’akagari ka Bibare muri Muhura no muri Bugarura mu murenge wa Remera.
Umuyobozi w’Akarere ka Gatsibo Gasana Richard, yemeza ko kurengera ibidukikije biri mu nshingano za buri wese nk’Umunyarwanda, anemeza ko kugeza ubu hari abayobozi benshi bamaze gusezerera kubera ko batarengeye ibidukikije,
Yakomeje agira ati: “Gucukura amabuye mu buryo butemewe tuba twangiza ibidukikije, twangiza amashyamba, twangiza imisozi, dutema amatiyo y’amazi aho anyura, ndababwira mwa bantu mwe mwangiza ibidukikije n’ibindi bikorwaremezo, ntabwo byemewe kuko niho dufite ubuzima”.
Bamwe mu baturage bari bitabiriye ibi biganiro bemeza ko basobanukiwe n’ibyo bigishijwe, dore uko bivugwa na Gashyitsi Joseph akaba yarahoze ari umwe mu bakoraga ubucukuzi bw’amabuye y’agaciro butemewe
Yagize ati: “Ibi nanjye hambere ngifite imbaraga najyaga gucukura ariko aho bitangiye kuziramo impfu ibirombe bibagwira sinongeye gusubiramo, n’ubu rwose hari abantu biyiba bakagenda bakajyamo bagacukura, hari igihe iyo bagiyemo ubwabo iyo bagezemo baryaryana bakaba banakwicana, icyo nasobanukiwe ni uko hari itegeko rihana ibi byose ndetse ko ntakwiye kubirebera kuko nanjye ingaruka zabyo zizangeraho ntintabyamagana”.
Undi mubyeyi witwa Uwamariya Josephine avuga ko ubu bucukuzi butemewe bukorerwa ahitwa mu Runazi, kandi ababikora ngo barazwi bityo abaturage ubwabo bakaba biyemeje gufatanya n’inzego z’ubuyobozi n’iz’ umutekano mu gutanga amakuru kugira ngo abo bantu bangiza ibidukikije bafatwe.
Ubuyobozi bw’Akarere ka Gatsibo bwemeza ko hari abantu 20 bamaze gufatwa bakoraga ubucukuzi bw’amabuye y’agaciro butemewe bazwi ku izina ry’Imparata bakaba bari kwigishwa kugira ngo nibajya no guhanwa bazabe bazi neza icyaha bakoze kugira ngo nibagaruka muri sosiyete batazongera kwishora muri ibi byaha.
