Imiryango igera ku 2,638 iri mu cyiciro cya mbere cy’ubudehe mu karere ka Gatsibo yamaze gutera intambwe isaba gukurwa muri iki cyiciro kuko yikuye mu bukene.
Iyi miryango ivuga ko mbere yari ibayeho nabi ndetse yumvaga itazava mu cyiciro cya mbere cy’ubudehe ariko nyuma yaje guhindura imyumvire binyuze mu guhugurwa no guterwa inkunga bajya mu matsinda barizigama none ubu nabo bafite ibyo bamaze kugeraho, ari nabyo bashingiraho basaba gukurwa muri iki cyiciro kuko baterwa ipfunwe no kuba bari mu bafashwa na leta.
Umuryango wa Bizabarimana Emmanuel na Mukandabananiye Evangelyne utuye mu Murenge wa Gitoki mu Kagari ka Nyamirama mu mudugudu w’Akagarama, ni umwe mu miryango yasabye guhindurirwa icyiciro itanga ubuhamya bw’uko yari ibayeho, aho inzira yo kwikura mu bukene yatangiriye n’aho igeze uyu munsi.
Bizabarimana yatangiye agira ati: “Ndi umwe mu baturage baba mu cyiciro cya mbere nkaba uyu munsi nshaka kukivamo kandi ibihamya birahari, nakoze muri VUP njya mu matsinda, ubwa mbere nagabanye 400,000frw tugura imashini ubu twiteje imbere.”
Mukandabananiye Evangelyne na we agaruka ku rugendo rwe rw’iterambere yagize ati: ”Twagiye mu cyiciro cya mbere koko tumeze nabi bigaragara tuba mu nzu dukodesha ubuzima bwaranze, kandi twarabwemeye ariko ku bufatanye na leta duhabwa amahugurwa n’indi mishanga iraduhugura ariko nkumva sinava mu cyiciro cya mbere nkumva nagumamo ngo bakomeze banyishyurire mituweli.”
“Rero urugendo rwacu rwo kwikura mu bukene twahawe amahugurwa twinjira mu matsinda yo kwizigamira, umugabo wanjye yakoraga muri VUP ahembwa amafaranga 1200frw, nyuma aza guhembwa 1500frw ku munsi, amafaranga ahembwe tukayajyana mu matsinda, tukizigama njye kuko nari nzi kudoda twaragabanye tugura imashini ebyiri zidoda.”
Asoza yagize ati: ”Nyuma rero nibwo hajemo gahunda yo kwigisha abari mu cyiciro cya mbere imyuga umugabo na we ajya kwiga kudoda, ubu aradoda nanjye ndadoda, yavuye muri VUP hanyuma ya mafaranga yo mu mashini dukomeza kuyizigama tugabana 1,400,000frw; hanyuma amafaranga twarayafashe tuguramo imashini enye n’igare hari n’izindi eshanu nkodesha ubu tumeze neza.”
Umuyobozi w’Akarere ka Gatsibo Gasana Richard avuga ko kuba abantu bava mu cyiciro kimwe bajya mu kindi ari intanbwe nziza kandi ari urugero rw’ibishoboka.
Yagize ati: ”Twasinye imihigo yo kuvana abari mu bukene mu bukene barimo bagatera intambwe bakava aho bari bakajya aheza, bakava mu cyiciro kimwe banjya mu kindi ,iyo mihigo rero umwaka urashize twafashe imiryango 100 muri buri kagari tuyikomatanyirizaho ubufasha butandukanye nabo babigizemo uruhare.”
Yakomeje agira ati:”Mubyo twabafashije rero hari abahawe gukora muri VUP, hari abahawe inka muri gahunda ya Girinka Munyarwanda, abandi bahabwa ubumenyi mu bijyane n’imyuga bashobora kwiga basoza tukabaha ibikoresho, hari abo twahaga imbuto n’ifumbire kugira ngo umusaruro wiyongere, uyu munsi rero turabona ko hari ibishoboka twabonye ko hari abateye intambwe, turashaka ko uyu mwaka imiryango yose izaba yavuye mu bukene.”
Kugeza ubu mu karere ka Gatsibo habarurwa imiryango isaga 6,900 iri mu cyiciro cya mbere cy’ubudehe kibarizwamo abatishoboye; 2,638 muri yo ikaba isaba kuvanwa muri iki cyiciro.
