Mu karere ka Gatsibo hatangijwe imurikabikorwa ry’abafatanyabikorwa b’Akarere rizamara iminsi itatu, bamwe mu bafatanyabikorwa bemeza ko uyu ari umwanya mwiza wo kwereka abaturage ibyo bakora.
Ni imurikabikorwa ribaye mu gihe iki cyumweru cyahariwe Kwibohora, umunsi mukuru uzizihizwa ku nshuro ya 28 tariki 4 Nyakanga 2022.
Imurikabikorwa ry’abafatanyabikorwa b’Akarere ka Gatsibo riri kubera mu murenge wa Kabarore aho ryitabiriwe n’abafatanyabikorwa b’akarere batandukanye berekana ibikorwa na serivisi baha abaturage bo mu Karere ka Gatsibo.
Umuryango Education Heath and Economy(E. H. E) ni umwe mu bafatanyabikorwa uri kumurika ibyo ukora muri iri murikabikorwa ry’Akarere ka Gatsibo (Open day) ryatangiye kuva kuva 27 Kamena kugeza kuwa 30 Kamena,
Umuyobozi wa EHE Sheikh Muhoza Issa avuga ko iri murikabokorwa ari umwanya mwiza wo kwereka abaturage ibyo babakorera, yakomeje agira ati: “Muri uyu mwaka tworoje abaturage 15 amatungo magufi, abana 23 bafashijwe gukurwa mu mirire mibi, twubakiye abatishoboye babiri tubaha inzu zo guturamo, imiryango 300 yishyuriwe mituweli, hari abantu 60 bigishijwe ubudozi aba barimo urubyiruko n’abagore.”
Ihuriro ry’Abafatanyabikorwa mu iterambere ry’Akarere ka Gatsibo-JADF Gatsibo ryagize uruhare mu bikorwa by’imihogo y’akarere n’iterambere ry’abaturage aho ibikorwa byabo bibarirwa agaciro k’amafaranga y’u Rwanda asaga miliyari esheshatu.
Muhorana Edward Umuyobozi wa JADF Gatsibo, yagize ati: “Hari ibintu byinshi twafatanyije n’akarere harimo nk’umuyoboro w’amazi wa Minago umuyoboro watumye abaturage babona amazi meza, mu burezi twafatanyije guhugura abarimu no gutanga ibitabo ndetse no kubaka amasomero mu midugudu bizafasha kuzamura ireme ry’uburezi.”
“Mu bukungu twafashije abaturage bo mu miryango iri mu cyiciro cya mbere n’icya kabiri cy’ubudehe tubaha amahugurwa n’inkunga bibafasha kwiteza imbere.”
Umuyobozi w’Akarere ka Gatsibo Gasana Richard ashima uburyo bakorana n’abafatanyabikorwa bahereye mu igenamigambi, ikurikirana n’ishyirwa mu bikorwa ry’imihigo y’akarere,
Yakomeje agira ati: “Mu myaka ine ishize iri huriro ry’abafatanyabikorwa ibikorwa ryafatanyijemo n’Akarere buri mwaka ntibarajya munsi ya Miliyari eshanu z’amafaranga y’u Rwanda, umwaka utaha naho harimo arenga miliyari 6, ibyo rero ni ibikorwa bihambaye cyane ku ngengo y’imari y’akarere ubu igera kuri miliyari 30.”
Muri iki icyumweru cy’ibikorwa byo kwibohora hazasurwa ibikorwa byahizwe mu mwaka w’imihigo wa 2021/2022 byahezweho.
