Akarere ka Gatsibo kagaragaje ibikorwa katangiye gukora kandi bigikomeje mu minsi 16 y’Ubukangurambaga bwo gukumira ihohoterwa rishingiye ku gitsina.
Umukozi w’Akarere ka Gatsibo Ushinzwe Kurengera Umwana, Sebatware Clement yavuze ko iyi minsi 16 mpuzamahanga yo gukumira ihohoterwa rishingiye ku gitsina yizihizwa ku isi hose, ifite insanganyamatsiko igira iti: “Dufatanye dukumire ihohoterwa rishingiye ku gitsina.”
Mu kiganiro Sebatware yagiranye na MUHAZIYACU yavuze ko Akarere katangiye ubu bukangurambaga ku wa Gatandatu, tariki 25 Ugushyingo mu Murenge wa Nyagihanga, kandi ko urugamba rwo guhangana n’ihohoterwa rishingiye ku gitsina rukomeje.
Yagize ati: “Twe mu karere kacu, twatangiye ku wa Gatandatu tariki 25 mu Murenge wa Nyagihanga, burakomeje, dufite gahunda ngari y’ibizakorwa. Uyu munsi hahuguwe abagabo b’icyitegererezo, abagabo bahuguwe ni abo mu Mirenge ya Murambi, Kiziguro na Rwimbogo, ni abagabo b’icyitegererezo ba bandi twita inyangamugayo bagomba gufasha abandi; muri macye basanzwe bafite izo nshingano ariko dukomeje kubakangurira kugira uruhare rugaragara muri iyi minsi 16.”
Yongeyeho ko bafite gahunda yo kuganira n’abanyeshuri mu bigo by’amashuri hagamijwe gukumira ihohoterwa rishingiye ku gitsina, by’umwihariko inda ziterwa abangavu.
Ati: “Tuzajya mu bigo by’amashuri bitandukanye mu karere kacu, ibyo birateganyijwe. Hari ikiganiro dufite ku wa Gatanu kitwa Tuganire Mwari, tuzaganira n’abakobwa bonyine, abakobwa bari hagati y’imyaka 12 kugera kuri 19. Twatoranyije abana 150 b’abakobwa tuzaganira na bo, bizabera mu Murenge wa Kiramuruzi ku Kigo cy’Urubyiruko.”
Muri iyi minsi 16 hateganyijwemo ibikorwa birimo gutanga ubutumwa kuri iyi minsi 16 mu nteko z’abaturage ziba ku wa Kabiri, gutanga serivisi z’ubuzima ku bahohotewe, gufasha abahohotewe gusubira mu buzima busanzwe, irushanwa ry’umupira w’amaguru n’irushanwa mu baturage ryo gusubiza ibibazo ku ihohoterwa rishingiye ku gitsina, amarushanwa yombi azaba arimo ibihembo ku bakoze neza.
Ibi bikorwa byose bizarangirana n’ubu bukangurambaga ku itariki 10 Ukuboza, ariko Sebatware yibutsa ko gahunda yo kurwanya ihohoterwa rishingiye ku gitsina yo izagumaho.
Mu Karere ka Gatsibo, nubwo ihohoterwa rishingiye ku gitsina rimaze kugabanuka, haracyagaragara abana bahohoterwa, imibare igaragaza ko kuva muri Nyakanga 2023 kugera muri uku Gushyingo hamaze gusambanywa abana 16.
Byitezwe ko ubu bukangurambaga buzatanga umusaruro mu guhindura imyumvire no kwigisha abantu ku ihohoterwa rishingiye ku gitsina binyuze mu bikorwa bitandukanye by’ubukangurambaga.
