Umuyobozi w’Akarere ka Gatsibo Gasana Richard ahamya ko ubufatanye bagirana n’abafatanyabikorwa bo mu madini n’amatorero bwazamuye imyumvire mu kwigisha abaturage bari barinangiye ntibemere gufata urukingo rwa COVID-19
Akarere ka Gatsibo ni kamwe mu turere tumaze gukataza mu gukingira abaturage bari baranze gufata urukingo rwa COVID-19.
Meya Gasana Uyobora aka karere avuga ko abo bari barabaruye banze kwikingiza bose bagezweho baraganirizwa, ni mu kiganiro yagiranye n’Umunyamakuru wa MUHAZIYACU, aho yagize ati: “Abo twabaruye bari banze kwikingiza ni 152, intwaro ya mbere ni ukubigisha mu midugudu barimo abinangiye n’abo bakomeza kwigishirizwa ku murenge, bigishwa n’abayobozi n’abanyamadini ni nabo badufasha cyane kuri bamwe babyanga kubera imyemerere, abari baranze gufata urukingo bose ubu barabyemeye bamaze gukingirwa.”
Hari zimwe mu mpamvu abadashaka kwikingiza bagiye babwira abayobozi zirimo nk’ abavuga ko imyemerere bafite ibabuza guterwa urukingo, abandi ni abavuga ko batabishaka gusa kuko muri bo bumva badashaka gukingirwa, abandi ngo ni abavuga ko batajya baterwa inshinge kuko zibagiraho ingaruka.
Bamwe mu baturage bakingiwe bo mu Murenge wa Gasange bemeza ko aya ari amahirwe adasanzwe buri wese adakwiye kumucikwa, kuko basanze ikibazo cya COVID-19 cyabaye ik’isi yose ndetse ngo aho bigana ni uko ntawuzabasha guterana n’abandi mu gihe atikingije,
Umwe mu banyamadini ahamya ko imyemerere yitwaza na bamwe muri bagenzi babo nta shingiro ifite nk’uko byemezwa n’umushumba w’Ururembo rwa Nyagatare mu Itorero ADEPR Rev. Pastor Bizimana Jean Baptiste,
Yagize ati: “Turababwira ngo bikingize tukabaganirira tukabaganiriza tubereka ko kwikingiza nta kibazo na kimwe kirimo, kandi tuzakomeza kubikora dufatanye na Leta ni inshingano yacu kubera ko iyo umuntu afite imyumvire mibi akagira ikibazo aremerera sosiyete kandi bitari ngombwa.”
Nyuma y’uko aba baturage 152 bose bakingiwe, kuri ubu mu Karere ka Gatsibo hagiye gukorwa ibarurwa kugira ngo hamenyekane niba haba hari abandi baturage baba batarikingiza nabo bagahugurirwa ibyiza by’inkingo.
