Mu Murenge wa Rwimbogo hari abaturage bavuga ko bamaze imyaka itatu bateza imyaka kuko iribwa n’agakoko bita “Mukondo w’inyana” bavuga ko kaburiwe umuti. Abashinzwe ubuhinzi bo bakemeza ko hasabwa kubahiriza inama bagirwa zo gutegura neza imirima.
Mu Kagari ka Munini mu Karere ka Gatsibo niho hari ikibazo cy’agakoko kitwa “Mukondo w’inyana” kameze nk’umunyorogoto, utu dukoko twibasira cyane imyaka yatewe mu mirima
Umunyamakuru wa MUHAZIYACU yajyanywe muri iyi mirima y’abaturage kugira ngo yirebere uko iki cyonnyi kimeze, mu mirima y’ibigori, ibishyimbo n’ibirayi hose byuzuyemo,
Ni ibyonnyi bigaragarira amaso mu buryo bworoshye, kuko uyu muhinzi yigije ku ruhande itaka gato gusa duhita tugaragara, mu mirima y’ibirayi yo tuba tujagata
Bamwe muri aba baturage bavuga ko ibi byonnyi bimaze igihe kandi biyambaje abashinzwe ubuhinzi ntibagira igisubizo babaha,
Batamuriza Annonciata, yagize ati: “Hari ibikoko biba mu itaka biturira imyaka, birya ibishyimbo, ibigori n’ibirayi n’ibijumba n’imyumbati, ba Agoronome baraje barabipima babura ubwoko bwabyo barigendera.”
Mukandahiro Vestine, yagize ati: “Uratera wamara gutera ibyo bisimba bikinjira mu ntete hasi, intete zitaramera noneho ikigori ntikimere, ni ibintu tumaranye imyaka irenga itatu.”
Hari umuturage wahinze ibishyimbo ku buso bungana n’intambwe 35 kuri 35 yemeza ko nta biro icumi yakuye muri uyu murima,
Dore icyifuzo cy’uyu muturage: “Bibaye ngombwa baza bagakora ubushakashatsi, bibaye ngombwa bakadushakira imiti kuko ntabwo leta izakomeza kudutunga kandi tubasha gukora.”
Umwe mu nzobere mu buhinzi yemeza ko ibi bikoko bisanzwe, ngo akazi kabyo ni ako kurya ibyaboreye mu mirima, kugira ngo bibore neza, ngo iyo utu dukoko tubaye twinshi ahantu tukabura ibyo turya twinjira mu mbuto zatewe cyangwa mu mizi y’imyaka.
Umuyobozi w’Akarere ka Gatsibo wungirije ushinzwe iterambere ry’ubukungu Sekanyange J. Léonard yemeza ko iki kibazo bagiye kukimenyesha ababishinzwe kugira ngo abaturage bafashwe kubona umuti w’iki kibazo cy’udukoko twangiza imyaka y’abaturage.
Umwe mu bakozi b’ikigo cy’Igihugu gishinzwe ubuhinzi n’ubworozi- RAB, kuri sitasiyo ya Nyagatare ni Kagwa Evalde yemeza ko gutera umuti mu butaka atari wo muti urambye,
Yagize ati: “Nta muti wajya mu butaka, gutera umuti mu butaka ni ikintu kibi ushobora guteramo imiti ubutaka ntibuzongere kwera na rimwe kuko ubutaka bugizwe n’udukoko twinshi kandi dufite akamaro.”
Kagwa akomeza avuga ko hari inama enye bagira abahinzi mu rwego rwo kurwanya ibi bikoko. Iya mbere ni ugutunganya neza ubutaka, icya kabiri ni ugutera imbuto zihungiye, iya gatatu ni ugukoresha ishwagara kuko yo irwanya ubu bukoko ku buryo bworoshye; iya kane ni uko abaturage bakwiye guhinga bahinduranya imyaka.
Iki kibazo ntikiri mu Kagari ka Munini muri Gatsibo honyine kuko no mu Karere ka Nyagatare mu Murenge wa Karangazi ahitwa Ndama.
