Gatsibo: Abapasiteri barwaniye mu rusengero Polisi iratabara

Mu Murenge wa Ngarama, Akarere ka Gatsibo abapasiteri babiri bo mu Itorero Inkurunziza barwaniye mu materaniro bapfa amakimbirane,  kuri iki cyumweru tariki ya 26 Mutarama 2020.

Amakuru agera kuri  muhaziyacu.rw agaragaza ko abo bavugabutumwa bwiza, barwanye biturutse ku makimbirane bari bafitanye hagati yabo.

Abarwanye ni  umuvugabutumwa witwa Mbaraga Ignace wayoboraga  Itorero ry’Inkurunziza ku Mudugudu wa  Ngarama, n’Umudiyakoni witwa Sayinzoga Saidi, ngo bari bamaze igihe kirekire bafitanye amakimbirane yo kutubahana, batumvikana ku uyobora undi hagati yabo.

Umuvugizi wa Polisi mu Ntara y’Iburasirazuba CIP Hamdun Twizeyimana yabwiye muhaziyacu.rw ko byabaye  ku manywa i saa tanu  n’uko byagenze.

Yagize ati: “Ejo tariki ya 26, mu gihe cya saa tanu z’amanywa uyu mwarimu Mbaraga Ignace yari agiye kwigisha mu rusengero wa Mudiyakoni Saidi amubwira ko adashobora kujya kwigisha batabanje gukemura ibibazo bafitanye hagati yabo, undi na we ati ‘ndigisha ibibazo tubikemure nyuma.

Muri uko gutera amahane, bararakaranya, bafatana mu mashati, baragundagurana.  Hari hari umudamu  utwite hafi yabo baramugwira, agira ikibazo, bamutwara ku kigo nderabuzima ariko kugeza ubu amakuru ahari ni uko uwo mubyeyi amerewe neza, ntabwo byamugizeho ingaruka bikomeye.”

Polisi y’u Rwanda yamenye iby’aya makuru nyuma yuko mu gihe abo bavugabutumwa barwanaga, umukiristu umwe wo muri iryo torero yayitabaje, ishami ryayo rya Ngarama, ritabara  vuba bitaraba bibi cyane.

Kugeza ubu  abarwanye, bombi  bari mu maboko y’ubugenzacyaha.

Kuri uyu wa mbere  Urwego rw’Ubugenzacyaha (RIB), Polisi, Ubuyobozi bw’Umurenge wa Ngarama n’ubw’Itorero Inkurunziza biriwe mu nama yo guhumuriza abakiristu no guhosha ayo makimbirane.

Kabitera ngo ni  undi mupasiteri

Mu kiganiro muhaziyacu.rw imaze kugirana n’Umuvugizi  wungirije wa mbere w’Itorero Inkurunziza mu Rwanda Pasiteri Ntirushwamaboko Jean Nepomuscene yavuze ko amakimbirane ari hagati y’ umuvugabutumwa witwa Mbaraga Ignace wayoboraga  Itorero rya Ngarama,  n’Umudiyakoni witwa Sayinzoga Saidi barwanye;  ngo yabibwe n’undi mupasitori witwa  Nzabikiramo Emmanuel Birutwa.

Yagize ati: “Ingamba dufite, twafatiye hamwe n’ubuyobozi bwite bwa Leta n’Inzego z’Umutekano,  nuko abafitanye ibibazo bagomba gusabana imbabazi n’ubu baracyafunze. Ariko ibigaragara ni uko n’ibibazo bafitanye byatejwe n’undi mupasiteri witwa Nzabikiramo Emmanuel Birutwa,… we biranagaragara ko agomba gufatirwa n’ibyemezo birimo no guhagarikwa ku nshingano z’itorero z’ubupasiteri.”

Urwo rusengero rw’Itorero Inkurunziza, Umudugudu wa Ngarama, mu Murenge wa Ngarama ngo ntirwari rwujuje ibisabwa.

Ubuyobozi bw’Umurenge wa Ngarama bwahise bufata umwanzuro wo kuba rufunzwe.