Ubwo yifatanyaga n’abatuye mu Karere ka Bugesera kwizihiza umunsi w’Intwari z’Igihugu, Guverineri w’Intara y’Iburasirazuba Rubingisa Pudence yasabye urubyiruko gushyira imbaraga mu kwiga no gukunda Igihugu rugaharanira kugira ubuzima bwiza rukirinda kwiyandarika.
Ibi yabigarutseho mu birori byabereye kuri stade y’Akarere ka Bugesera kuri uyu wa Gatandatu tariki 01 Gashyantare 2025.
Agaruka ku gushishikariza urubyiruko kurangwa n’umuco w’ubutwari, Guverineri Rubingisa yagize ati: “Kubaka igihugu dushyira imbere inyungu zacyo: Duteza imbere umutekano, turwanya ivangura iryo ariryo ryose, guharanira ubuzima bwiza, urubyiruko rukiga neza rugakunda Igihugu rurushaho kwirinda ingeso mbi nk’ubusinzi, uburara, ubujura ndetse no kwiyandarika.”
Mu kiganiro kigaruka ku butwari bw’Ingabo w’u Rwanda n’ubutwari bw’Abanyarwanda muri rusange cyatanzwe na Rutayisire Jackson, impuguke mu mateka y’u Rwanda, yasabye urubyiruko guterwa ishema n’ibyo Igihugu cyagezeho.
Yagize ati: “Rubyiruko mukwiye guterwa ishema n’uburyo intwari z’u Rwanda zakoze ibidasanzwe kugira ngo uyu munsi tube dufite igihugu kitavogerwa, kitisukirwa. Ibi ni kamere gakondo y’umuryango nyarwanda.”
Umwe mu rubyiruko rwitabiriye Umunsi w’Intwari z’Igihugu, Byiringiro Rene, yagize ati: “Twakiriye neza impanuro twahawe n’abaduhaye ibiganiro ndetse n’ubutumwa bw’Umuyobozi w’Intara yacu y’Iburasirazuba. Icyo nk’urubyiruko dukwiye kuzirikana ni uko turi mu gihugu kiduha amahirwe kandi kiteguye kudufasha kugera ku nzozi zacu mu gukora byiza kandi byinshi.”
Ibirori byo kwizihiza Intwari z’Igihugu, byanaranzwe b’ibikorwa by’umupira w’amaguru ku makipe yakinnye imikino ya nyuma y’irushanwa Umurenge Kagame Cup 2025 mu bagabo n’abagore, aho Umurenge wa Kamabuye wegukanye iki gikombe utsinze Umurenge wa Musenyi 2-0. Naho ikipe y’Umurenge wa Kamabuye mu bagore yatsinze iy’uwa Ngeruka 2-1.
Mu bindi bikorwa byaranze umunsi w’Intwari z’Igihugu, harimo no koroza abaturage batishoboye bahawe inka.
