Ku bufatanye bw’Ikigo cy’Igihugu gishinzwe Ibizamini n’Ubugenzuzi bw’Amashuri, NESA, Ubuyobozi bw’Akarere n’ibigo by’amashuri byatoranyijwe muri gahunda y’Isuzuma Mpuzamahanga rizwi nka PISA, batangiye ibikorwa byo gukangurira no gusobanurira abanyeshuri biga muri ibi bigo uburyo bazitabira iri suzuma, bagaragaza ko biteze umusaruro mwiza ugamije kuzamura ireme ry’uburezi.
Ubukangurambaga bw’isuzuma mpuzamahanga ku bigo by’amashuri, mu Karere ka Bugesera bwatangiriye ku ishuri rya Maranyundo Girls School kuri uyu wa Gatatu tariki 19 Werurwe 2025.
Umuyobozi w’Ishami ry’uburezi mu Karere ka Bugesera, Gashumba Jacques avuga ko imyiteguro irimbanije mu mashuri yo mu Karere ka Bugesera yatoranijwe gukorerwamo isuzuma mpuzamahanga rya PISA/2025, kandi ko rizabafasha kurushaho kuzamura ireme ry’uburezi.
Ati: “Iri suzuma mpuzamahanga rizadufasha kurushaho kuzamura uburezi bw’u Rwanda twigereranya n’amahanga, ariko bigafasha n’abanyeshuri kurushaho gutekereza byagutse. Rero ubu dukomeje gufasha abayobozi b’ibigo by’amashuri kurushaho kubyumva neza no gutegura abana”.
Umwe mu banyeshuri biga mu ishuri rya Maranyundo Girls School witwa Hirwa Teta Keny Loxane, ari mu banyeshuri bazitabira iri suzuma mpuzamahanga, avuga ko amasomo azakorerwamo isuzuma mpuzamahanga rya PISA/2025 asanzwe ayatsinda neza, ashima iyi gahunda NESA yabageneye.
ati: “Ngiriwe amahirwe yo kuba umwe mu bazahagararira ikigo cyacu ndetse n’Igihugu, twazitwara neza kuko amarushanwa mpuzamahanga dusanzwe tuyakora kandi tukitwara neza cyane, kandi bizatuma tumenya uko uburezi bwacu mu gihugu bumeze; mbese ni isuzuma riziye igihe”.
Mudahinyuka Audace ushinzwe ushinzwe amasomo mu kigo cya Maranyundo Girls School, avuga ko bagiye kurushaho gutegura abanyeshuri, cyane cyane abiga mu mwaka wa Gatatu ngo kuko aribo bashobora kuzatorwamo abazakora Isuzuma Mpuzamahanga rya PISA/2025.
Ati: “Tugiye kurushaho gukora imbanzirizasuzuma kugira ngo igihe cy’isuzuma bazabe baramenyereye uko bikorwa.”
NESA ivuga ko iri suzuma mpuzamahanga rizakorerwa ku masomo y’imibare, siyansi ndetse no guzoma neza ururimi rw’Icyongereza.
Mu Karere ka Bugesera hatoranyijwe ibigo birindwi (7) bizatanga abanyeshuri 35 kuri buri kigo cyatoranyijwe kwitabira iri suzuma.
Ni isuzuma rizaba muri uyu mwaka ariko amanota akazatangazwa mu mwaka utaha wa 2026, naho irindi suzuma mpuzamahanga rya PISA rikazaba mu mwaka wa 2029.
