Ikigo cy’Igihugu cy’Ubuzima (RBC) cyatangaje ko abagore n’abakobwa bagera ku 3,200 bashatse serivisi zo gukuramo inda mu buryo bwemewe n’amategeko mu mwaka w’ingengo y’imari wa 2025-2026.
Muri bo, hagati ya 900 na 1,000 bahawe izi serivisi mu bigo nderabuzima 43 byari mu mushinga w’igerageza wakorewe mu turere twa Musanze, Karongi, Rwamagana na Ruhango, kuva muri Nyakanga 2025 kugeza muri Kamena 2026.
Uyu mushinga wari ugamije kwegereza abaturage serivisi zo gukuramo inda byemewe n’amategeko, kugira ngo zitangirwe no mu bigo nderabuzima byujuje ibisabwa, aho kuba mu bitaro gusa.
RBC ivuga ko ibyavuye muri iri gerageza biri gufasha gutegura uburyo bwo kwagura izi serivisi zikagera ku bigo nderabuzima byo mu Gihugu hose.
Muri iyi gahunda, abaforomo n’ababyaza bahuguwe bakira kandi bagasuzuma abagore n’abakobwa bashaka izi serivisi, bagakora ibizamini bikenewe. Ibisubizo byabyo binyuzwa muri sisitemu y’ikoranabuhanga bigasuzumwa n’umuganga ukorera mu bitaro, kugira ngo hafatwe icyemezo hakurikijwe amabwiriza agenga iyi serivisi.
Kwagura izi serivisi bishamikiye ku mpinduka zakozwe mu mabwiriza agenga ibigo byemerewe kuzikora, zatangajwe mu Ukuboza 2024. Izo mpinduka zatanze amahirwe yo kuzitangira no mu bigo nderabuzima byahawe uburenganzira na Minisiteri y’Ubuzima kandi byujuje ibisabwa.
Ku bigo nderabuzima bishingiye ku myemerere y’amadini bitanga serivisi zimwe na zimwe ariko ntibyemere izo gukuramo inda kubera imyemerere yabyo, RBC ivuga ko abarwayi bashobora koherezwa mu bindi bigo cyangwa ibitaro bitanga izo serivisi.
RBC irateganya gukomeza gukoresha ibyavuye mu mushinga w’igerageza mu gutegura uburyo bwo kugeza izi serivisi ku baturage benshi, hubahirizwa amategeko n’amabwiriza agenga imitangire yazo.
