Minisiteri y’Ikoranabuhanga na Inovasiyo yagaragaje ko iterambere u Rwanda ruri kugeraho cyane cyane irishingiye ku ikoranabuhanga risaba ko ababyeyi bashyira imbaraga mu burezi bw’abana babo kugira ngo bazashobore gukoresha neza iterambere Igihugu kigenda kigeraho ndetse banarusheho kugira ubumenyi bwo kongera ibindi bikorwa birenze ibihari.
Ibi Umunyamabanga wa Leta muri Minisiteri y’Ikoranabuhanga na Inovasiyo, Iradukunda Yves yabigarutseho kuri uyu wa Gatandatu tariki 31 Mutarama 2026 ubwo yifatanyaga n’abaturage b’Akarere ka Bugesera by’umwihariko abo mu Murenge wa Mwogo, mu muganda rusange.
Agaruka ku gushishikariza ababyeyi kwita ku burezi bw’abana babo, Iradukunda yeretse abaturage amahirwe ari mu Karere ka Bugesera arimo ikibuga cy’indege n’imirimo igishamikiyeho, agaragaza ko kuzayabyaza umusaruro bisaba gutegura abakiri bato bakitabwaho mu burezi kugira ngo bazashobore kuyabyaza umusarurro.
Ati: “Hano hari iterambere ridasanzwe, Bugesera irimo iratera imbere, kiriya kibuga cy’indege ni ikimenyetso cy’iterambere rigaragara kandi rifatika rizagira ingaruka nziza ku buzima bwanyu hano muri Bugesera ndetse no mu Gihugu hose. Ibyo rero bisobanuye ko uko iterambere rigenda riza tugomba kurushaho umuvuduko.”
Yakomeje agira ati: “Abana bacu bagomba kwiga bakagira ubumenyi, bakazatera imbere kugira ngo ibikorwa byose birimo biraza bizababere imbarutso yo gutera imbere no kugera ku bindi byiza birenze n’ibyo tubona uyu munsi.”
Umuyobozi w’Akarere ka Bugesera, Mutabazi Richard na we abona ko ababyeyi bakwiye kongera imbaraga mu kwita ku burere n’uburezi bw’abana babo cyane cyane kwita ku musanzu w’ifunguro rya saa sita ku ushuri.
Ati: “Mu rwego rwo kwita ku burezi bw’abana bacu kugira ngo babashe kwiga ngo bazagirire akamaro Igihugu, imiryango yabo ndetse na bo ubwabo, ni gombwa ko tubashyigikira muri urwo rugendo rwo kwiga bakamenya, twese tugafasha abana bacu bari ku mashuri kubona ifunguro rya ku manywa kugira ngo bige neza.”
Umuganda rusange usoza ukwezi kwa Mutarama 2026, mu Karere ka Bugesera waranzwe n’ibikorwa byo gusana imihanda itandukanye, gusibura inzira z’amazi, no gusukura ahantu hahurira abantu benshi; ku rwego rw’Akarere, uyu muganda wabereye mu Murenge wa Mwogo
