Buri mwaka, tariki 01 Gashyantare, kuva mu mwaka wa 1999 u Rwanda n’inshuti z’u Rwanda bizihiza umunsi w’Intwari z’u Rwanda, hazirikanwa ibikorwa byiza byaranze Intwari z’u Rwanda n’amasomo abantu bavomamo mu rugamba rwo guteza imbere Igihugu.
Urwego rushinzwe intwari z’Igihugu, imidari n’impeta z’ishimwe [CHENO] rusobanura ko ‘Intwari ari umuntu ukurikirana ibyo yiyemeje kugeraho bikavamo igikorwa cy’ikirenga gifitiye abandi akamaro, akabikora mu bupfura, mu kwihangana no mu bwitange buhebuje kandi akirinda ubugwari mu migirire ye, ntagamburuzwe n’amananiza.”
Mu kuzirikana ibikorwa by’ubutwari byaranze intwari z’u Rwanda zibukwa uyu munsi, zashyizwe mu byiciro bitatu bitandukanye, aribyo: Imanzi, Imena n’Ingenzi.
Imanzi, isobanurwa nk’intwari y’ikirenga yagaragaje ibikorwa by’akataraboneka birangwa n’ubwitange, akamaro n’urugero bihebuje, muri iki kiciro cy’Intwari z’ u Rwanda hashyirwamo intwari itakiriho.
Iki cyiciro cy’Imanzi niho harimo, Major General Fred Gisa Rwigema, Imanzi yaranzwe n’ubwitange buhebuje ubwo yayoboraga Ingabo za FPR Inkotanyi ku rugamba rwo kubohora u Rwanda mu mwaka wa 1990 nyuma akarugwaho. Yagiriye akamaro n’abandi benshi kuko yarwanye intambara aharanira guca ubuhunzi haba mu Banyarwanda no banyamahanga no guharanira uburenganzira bwa muntu n’ibindi. Yabereye abantu bose urugero rwiza rw’ubwitange bashobora gukurikiza.
Muri iki cyiciro kandi harimo Intwari itazwi izina, ikaba ihagarariye ingabo zose z’u Rwanda zaguye ku rugamba cyangwa se zashoboraga kurugwaho mu gihe cyahise, icy’ubu ngubu n’ikizaza zirwanira Igihugu.
Imena, ni icyiciro cy’intwari kigizwe n’umuntu uzwiho ibikorwa bidasanzwe yakoreye igihugu kirangwa n’igitambo cy’ikirenga, akamaro gakomeye n’urugero. Muri iki cyiciro harimo: Umwami Mutara III Rudahigwa, Rwagasana Michel, Uwiringiyimana Agathe, Niyitegeka Felicite, n’abanyeshuri b’i Nyange.
Icyiciro cya 3 cy’Intwari z’u Rwanda ni Ingenzi, kigizwe n’umuntu urangwa n’ibitekerezo by’indashyikirwa, cyangwa ibyo yagezeho bidasanzwe, birangwa n’ubwitange bukomeye, agaciro gakomeye, no kubera abandi urugero rwiza; muri iki cyiciro nta ntwari zari zashyirwamo.
Mu gihe hizihizwa umunsi w’Intwari kuri uyu wa 01 Gashyantare 2026, insanganyamatsiko igira iti “Ubutwari n’ubumwe bw’Abanyarwanda, inkingi z’iterambere.”
Mu byaranze iyizihizwa ry’Umunsi mukuru w’i Rwanda z’u Rwanda kuri uyu wa 01 Gashyantare 2026, ku rwego rw’Igihugu, Perezida Paul Kagame na Madamu Jeannette Kagame, bari kumwe n’abandi bayobozi bakuru n’abanyacyubahiro batandukanye, bunamiye Intwari z’u Rwanda banashyira indabo ku gicumbi cy’Intwari giherereye i Remera mu Mujyi wa Kigali.
