Umuyobozi w’agateganyo w’Akarere ka Nyagatare, Kakooza Henry, yasabye abaturage gukomeza gusigasira no kwimakaza indangagaciro z’ubutwari, agaragaza ko Intwari ari umuntu uharanira kugera ku ntego yiyemeje, bikavamo igikorwa cy’ikirenga gifitiye abandi akamaro.
Ibi Meya Kakooza yabigarutseho mu muhango wo kwizihiza umunsi w’Intwari z’u Rwanda wizihizwa buri mwaka tariki ya 1 Gashyantare, wabereye mu Murenge wa Tabagwe, ku ndake ya Gikoba, ahafite amateka akomeye mu rugamba rwo kubohora Igihugu.
Yagize ati: “Intwari ni umuntu ukurikirana icyo yiyemeje kugeraho, kikavamo igikorwa cy’ikirenga gifitiye abandi akamaro.”
Aha Gikoba ni ho Perezida wa Repubulika, Paul Kagame, yabaye igihe kingana n’amezi 11 mu bihe bikomeye by’urugamba rwo kubohora u Rwanda.
Meya Kakooza yagaragaza ko mu Karere ka Nyagatare, ubutwari bufite ishingiro rikomeye, cyane cyane hashingiwe ku mateka y’urugamba rwo kwibohora, aho Nyagatare yabaye amarembo yo kubohora Igihugu. Ibi byatumye aka Karere kaba ikimenyetso cy’aho urugendo rwo kongera gusubiza u Rwanda icyizere n’ubwigenge rwatangiriye.
Yibukije abaturage kandi ko muri izo ntwari z’ikirenga harimo Maj. Gen Fred Gisa Rwigema, watangije urugamba rwo kubohora Igihugu ku wa 1 Ukwakira 1990 ku mupaka wa Kagitumba.
Yagaragaje ko urwo rugamba rwabereye mu gice cya Nyagatare rufite igisobanuro gikomeye ku baturage bahatuye no ku Rwanda rwose.
Meya Kakooza yagarutse ku busobanuro bw’ubutwari muri iki gihe, avuga ko butagarukira gusa ku gufata intwaro, ahubwo bugaragarira no mu rugamba rwo guteza imbere Igihugu no kurinda ibyagezweho. Ati: “Muri iki gihe, ubutwari bugaragarira mu rugamba rwo guteza imbere Igihugu no kurinda ibyagezweho. Ni muri urwo rwego Abanyarwanda tugomba guharanira kurangwa n’ubutwari mu mitekerereze, mu mikorere, mu mibanire no mu mibereho ya buri munsi.”
Yasoje asaba Abanyarwanda bose, by’umwihariko abaturage b’Akarere ka Nyagatare, kwima amatwi no kwamaganira kure abantu bavuga u Rwanda uko rutari, ahubwo bagomba gukomeza kugendera ku ndangagaciro zubaka Igihugu, zirimo gukunda Igihugu, ubumwe n’ubupfura, gukunda umurimo, kugira ubushishozi, ndetse n’izindi ndangagaciro nyarwanda zifasha kubaka sosiyete itekanye, iteye imbere kandi irangwa n’ubumwe n’ubwiyunge.
